Պաշտպանության նախարարը ճիշտ է հերքել ոչ ճիշտ ներկայացված մեկնաբանությունը. Ա. Սաքունց

Այսօր լրատվամիջոցներից մեկի հետ զրույցում ՀՀ պաշտպանության նախարար Սեյրան Օհանյանն ասել էր, որ իրավապաշտպան Արթուր Սաքունցը ստում է:
Նա մասնավորապես հերքել էր իրավապաշտպանի այն մեկնաբանությունը, թե հայկական զինված ուժերում յուրաքանչյուր մահացության դեպք լուրջ քննարկման առարկա է դառնում ԵԱՀԿ անդամ բոլոր երկրներում: Այս մասին «Առաջին լրատվական»-ը զրուցեց Հելսինկյան Քաղաքացիական Ասամբլեայի Վանաձորի գրասենյակի ղեկավար, իրավապաշտպան Արթուր Սաքունցի հետ, որը նշեց, որ պաշտպանության նախարարը ճիշտ է ներկայացրել ոչ ճիշտ ներկայացված մեկնաբանությունը:

«Խնդիրը կայանում է հետևյալում. լրագրողը ճիշտ չի ներկայացրել այն մեկնաբանությունները, որ ես տվել եմ: Լրագրողը պարզապես ոչ պատշաճ կերպով է ներկայացրել այն մտքերը, որ ես ներկայացրել եմ, և դրանց հերքումը պաշտպանության նախարարի կողմից ճիշտ է»,- նշեց Ա. Սաքունցը` ներկայացնելով ճիշտ մեկնաբանությունը: Նա նշեց, որ բանն այն է, որ ԵԱՀԿ-ն զինված ուժերում մարդու իրավունքների և զինված ուժերի կազմակերպման չափորոշիչներ է մշակել, և ԵԱՀԿ անդամ երկրների զինված ուժերում մարդու իրավունքների հարցը ԵԱՀԿ նախագահի մշտական ուշադրության կենտրոնում է:

Ըստ նրա` ԵԱՀԿ-ն ունի հստակ չափորոշիչներ անդամ երկրների զինված ուժերում մարդու իրավունքների, զինված ուժերի կազմակերպման, կառավարման, բողոքարկման, տարբեր խնդիրների վերաբերյալ, որը նշանակում է, որ ԵԱՀԿ անդամ երկրների զինված ուժերում մարդու իրավունքների հարցը ԵԱՀԿ նախագահողի ուշադրության կենտրոնում է գտնվում:

Նա հերքեց լրատվամիջոցներում տարածված իր այն մեկնաբանությունը, թե զինված ուժերում մահացության յուրաքանչյուր դեպք քննարկվում է ԵԱՀԿ անդամ բոլոր երկրներում: «Ոչ թե բոլոր երկրներում է քննարկվում, այլ ԵԱՀԿ նախագահողի անմիջական ղեկավարությամբ քննարկվում են այդ հարցերը և նրա ուշադրության կենտրոնում են, քանի որ ԵԱՀԿ-ն է այդ չափորոշիչները մշակում»,- ասաց Սաքունցը:

Նրա տեղեկացմամբ` ԵԱՀԿ-ն այն կառույցն է, որն աջակցում է իր կազմակերպությանը անդամակցող երկրներին, եթե գոյություն ունի երկկողմանի համաձայնություն, այդ թվում՝ նաև Հայաստանի իրավապահ մարմինների և զինված ուժերի բարեփոխումներին: Ըստ իրավապաշտպանի` աջակցությունը ԵԱՀԿ կողմից բավական մեծ է, և բնականաբար այդ աջակցության շրջանակներում այն հարցերը, որոնք գոյություն ունեն, չեն կարող չքննարկվել բարեփոխումների ծրագրի իրականացման շրջանակում:

Աղբյուրը՝ http://www.1in.am/arm/armenia_society_55258.html