Ծեծի օրենսդիրը

Սյունիքի մարզպետ Սուրիկ Խաչատրյանի դեմ հարուցված քրեական գործը կարճելով, ուղղակի ձեռ են առնում հասարակությանը: Սա՝ իրավապաշտպան Արթուր Սաքունցի կարծիքն է:

Հիշեցնենք, որ ՀՔԾ-ն քրեական գործը կարճել է, հիմնավորելով, թե. գործարար Սիլվա Համբարձումյանին մեկ անգամ հարվածելը դեռ ծեծ չէ։

«Գործը կարճողներին ես հրավիրում եմ մեկ-մեկ իրենց ապտակելու ու թող քրեական գործ չհարուցեն, եթե դա համարվում է նորմալ»,- առաջարկեց Արթուր Սաքունցը:

Քրեական գործով՝ մարզպետը նոյեմբերի 14-ին «Արմենիա-Մարիոթ» հյուրանոցում պատահաբար հանդիպել է գործարար Սիլվա Համբարձումյանին, որի հետ տարաձայնություն է առաջացել եւ մարզպետը ծեծել նրան: Արթուր Սաքունցի համար սպասելի էր հարուցված գործի նման վերջաբանը. «շունը շան թաթ չի կծում, այդ տարբերակն է՝ միանշանակ»:

Գործը կարճելու մասին լուրը բավարարել է ՀՀԿ պատգամավոր Ռաֆիկ Պետրոսյանին, քանի որ ծեծի մասին նրա պատկերացումները համընկել են ՀՔԾ որոշման հետ։

«Ծեծը ենթադրում է մի շարք գործողություններ` ապտակներ, հարվածներ կամ քաշքշոցներ, որի հետեւանքով, մարմնական թեթեւ, չքայքայող վնասվածք է ստանում մարդը եւ այլն։ Ծեծը պիտի պատճառի ֆիզիակական, հոգեկան տանջանքներ մարդուն: Եթե մի անգամ քաշել է թեւից, ասենք թե. կամ հրել է մի հատ, դրանք իհարկե ծեծ չեն համարվում»,- «Ա1+»-ին պարզաբանեց պատգամավոր Ռաֆիկ Պետրոսյանը։

Ռաֆիկ Պետրոսյանը չի կարծում, որ Գործրար Սիլվա Համբարձումյանի նկատմամբ մարզպետը նման բռնություններ է կիրառել։

«Կա ապտակ՝ թեթեւ, որ դաստիարակչական նպատակով է արվել, եւ կա հարված, որ թեկուզ մի հարվածը մարմնական վնասվածք է պատճառում մարդուն, եւ ծեծ դիտելու համար, ուրեմն պետք է մի թեթեւ քսելը ձեռքի կամ քաշելը չհամարվի ծեծ: Գործողությունների համակցություն պետք է լինի ծեծը»,- բացատրում է օրենսդիր մարմնի ներկայացուցիչը:

Ռաֆիկ Պետրոսյանը համոզված է, որ Սիլվա Համբարձումյանին, Սյունիքի մարզպետ Սուրիկ Խաչատրյանն ընդամենը վիրավորել է, որի համար գործարար կինը քաղաքացիական հայցով կարող է դիմել դատարան:

Աղբյուրը` http://www.a1plus.am/am/politics/2011/12/13/rafik-petroyan