ՀՔԱ Վանաձորի գրասենյակը շրջանառության մեջ է դնում նախադեպային իրավունքը

«Մենք չենք հավակնում փոխարինել փաստաբանական ինստիտուտներին, պարզապես նախադեպային իրավունքը կարող է խթան հանադիսանալ արդարադատություն իրականացնելիս»,- այսօր լրագրողների հետ հանդիպմանն ասաց Հելսինկյան Քաղաքացիական Ասամբլեայի Վանաձորի գրասենյակի նախագահ Արթուր Սաքունցը:

 Նա նշեց, որ Հելսինկյան Քաղաքացիական Ասամբլեայի Վանաձորի գրասենյակը տաս տարիների ընթացքում նախաձեռնել է քսան դատական գործ և գործերի վերլուծությունը լույս է տեսել 412 էջանոց «Նախադեպային իրավունքն արդարադատության իրականացման գործընթացում» վերնագրով գրքում:

«Քաունթերփարթ ինթերնեշնլ» դոնոր կազմակերպության հայաստանյան ներկայացուցչության տնօրեն Ալեքս Սարդարը նշեց, որ մեծ պատրաստակամությամբ են իրենք համաձայնել ֆինանսավորել Վանաձորի գրասենյակին, քանի որ լավ ծանոթ են թե գրասենյակի, թե նրա նախագահ Արթուր Սաքունցի գործունեությանը:

«Հայաստանում նախադեպի կիրառումը դատական և արդարադատության ոլորտում դեռ կայացման փուլում է, նախադեպը ոչ միայն իրավական և փաստաբանական հնարավորություններ է տալիս ինչ-որ նեղ զանգվածի, ասենք իրավաբանների ու փաստաբանների համար, այլ հնարավորություն է ընձեռում լայն հասարակությանը տեղեկանալ իրենց իրավունքների ու պարտականությունների մասին, որը կնպասի նրանց ազատ գործունեությանը, լինի դա ընտրական , հետընտրական շրջան, թե առհասարակ մարդու իրավունքների ոլորտում, այսինք դա պետք է հասանելի լինի լայն հասարակությանը»- ասաց Ալեքս Սարդարը:

«Արնի Քընսալթ» ՍՊԸ տնօրեն, իրավաբան, ծրագրի փորձագետ Արա Ղազարյանի խոսքով` նախադեպային իրավունքը իր թերություններով հանդերձ գործում է: Ըստ Արա Ղազարյանի` տաս տարվա ընթացքում Հելսինկյան Քաղաքացիական Ասամբլեայի Վանաձորի գրասենյակի կողմից քսան ռազմավարական դատավարության գործերի արդյունքները գնահատելիս խնդիր կար հնարավորինս նվազեցնել սուբյեկտիվիզմի գորոծոնը: Այդ գործերը վերաբերում էին աշխատանքային իրավունքի, հանրահավաքների իրավունքի, տեղեկատվության ազատության և հանրային վերահսկողության իրավունքի խախտմանը:

«Այդ գիրքը մեծապես կազդի իրավունքի զարգացման վրա և մարդու խախտված իրավունքները վերականգնելու գործում: Մեկ անձը` հովիվը, որի գործով զբաղվեց Վանաձորի գրասենյակը, կարող է մտնել իրավունքի պատմության մեջ, հիմա այդ գործով նախադեպային իրավունքը արդեն դասավանդում են իրավունքի ոլորտում»,- ասաց Արա Ղազարյանը: Նա նշեց, որ այդ գործերից 4-ը վճռորոշ ազդեցություն է ունեցել, 6-ը կարևոր, մնացածը չեզոք, և չի եղել գործ որը բացասական նշանակություն ունենա:19 գործից 7-ում ամբողջովին վերականգնվել է իրավունքը 2-ի դեպքում մասամբ է վերականգնվել, 9 –ի դեպքում չի վերականգնվել:

Աղբյուրը` http://tert.am/am/news/2011/12/14/saqunc/