Ոստիկանապետի հասցեն անձնական գաղտնիք է. Սաքունցը նորից է դիմել դատարան

Հելսինկյան Քաղաքացիական Ասամբլեայի ՀՔԱ/Վանաձորի գրասենյակի ղեկավար Արթուր Սաքունցի հայցադիմումը ընդդեմ ՀՀ ոստիկանապետ Վլադիմիր Գասպարյանի` դատարանը վարույթ չի ընդունել:

Հիշեցնենք, որ Սաքունցը դիմել էր դատարան ընդդեմ  ՀՀ պաշտպանության փոխնախարար Վլադիմիր Գասպարյանի, ով, ըստ իրավապաշտպանի` զրպարտել էր ՀՔԱ Վանաձորի գրասենյակին:

Դատարանը գործը վարույթ չէր ընդունել` պատճառաբանելով, որ Վ. Գասպարյանի հասցեն ճիշտ չէ նշված հայցադիմումում  եւ նրանք չեն կարողանում գտնել այդ մարդուն:

«Մենք Վովա Գասպարյանի անձնական տվյալները վերցրել էինք Պաշտպանության նախարարության կայքից, այսինքն` անուն, ազգանուն, հայրանուն, ծննդյան ամսաթիվ եւ Կենտրոնական ընտրական հանձնաժողովի կայքի «Ընտրացուցակներ» բաժնից համեմատելով տվյալները,-ասաց Արթուր Սաքունցը Henaran.am-ի հետ հեռախոսազրույցում: -Ի դեպ, դրանից հետո դիմել ենք անձնագրերի եւ վիզաների վարչությանը` խնդրանքով տրամադրելու ոստիկանապետի տան հասցեն: Սակայն պաշտոնական հարցմանը պատասխանել են, որ «դա անձնական գաղտնիք է եւ չեն կարող տրամադրել»:

Այնուամենայնիվ, իրավապաշտպանը նորից է դիմել Կենտրոն եւ Նորք Մարաշի վարչական շրջանների ընդհանուր իրավասության դատարան` այս անգամ  պատասխանողի հասցեն նշելով ՀՀ ոստիկանության հասցեն: «Կարծում եմ դատարանը այդպես կկարողանա գտնել Վովա Գասպարյանին եւ գործը վարույթ կընդունի»,-ասաց Ա. Սաքունցը:

Աղբյուրը՝ http://henaran.am/?p=59094