Ձգձգված գործ. Տավուշի մարզի դատավորը չընդունեց հանրային շահի հիմնավորումը

Դատարանը որոշեց, որ ոստիկանները կասկածյալներ Վլադիմիր Տոնոյանի եւ Արմեն Մելքոնյանի նկատմամբ բռնություն չեն կիրառել

«Հելսինկյան Քաղաքացիական Ասամբլեայի Վանաձորի գրասենյակի» ղեկավար Արթուր Սաքունցը եղել էր Վանաձորի ձերբակալված անձանց պահման վայրում, ուր գողություն կատարելու համար 2009 թվականի սեպտեմբերի 29-ին ձերբակալված Վլադիմիր Տոնոյանը հայտնել էր, որ իր եւ գողության մեջ մեղադրված Արմեն Մելքոնյանի նկատմամբ ոստիկանության Սպիտակի բաժնի ծառայողները բռնություն են կիրառել, որպեսզի իրենցից ինքնախոստովանական ցուցմունքներ կորզեն: Լոռու մարզի քննչական բաժինը քննելով Վլադիմիր Տոնոյանի եւ Արմեն Մելքոնյանի բողոքը, նրանց նկատմամբ ոստիկանության գործողություններում բռնություն չէր հայտնաբերել եւ այդ առթիվ քրեական գործ չէր հարուցել: Արթուր Սաքունցն այդ կապակցությամբ դիմել էր Լոռու մարզի առաջին ատյանի դատարան, վերջինս բավարարել էր հայցը: Գործը հսկող դատախազը բողոքարկել էր դատարանի վճիռը, վերաքննիչը բավարարել էր դատախազի բողոքը: Սաքունցը դիմել էր Վճռաբեկ դատարան, որը բավարարել էր բողոքը: Գործը վերադարձվել էր ոստիկանության Լոռու մարզի քննչական բաժին, որը, ըստ օրենքի, Վճռաբեկի այդ վճռից հետո պարտավոր էր քրեական գործ հարուցել, սակայն քրեական գործի նյութերն ուղարկել էր Դիլիջանի քննչական բաժանմունք: Այդ բաժանմունքի ավագ քննիչ Սմբատ Սաղաթելյանը քննություն կատարելով՝ մերժել էր քրեական գործ հարուցել ոստիկանության Սպիտակի բաժնի ծառայողների հանդեպ: Սաքունցը համաձայն չլինելով քննիչի այդ որոշմանը՝ դիմել էր Տավուշի մարզի առաջին ատյանի դատարան: 2011 թվականի հուլիսի 14-ին Տավուշի մարզի առաջին ատյանի ընդհանուր իրավասության դատարանը (դատավոր՝ Ռաֆիկ Մելքոնյան) բավարարել էր «Հելսինկյան Քաղաքացիական Ասամբլեայի Վանաձորի գրասենյակ» հ/կ հայցը: ՀՔԱՎ-ը պահանջում է վերացնել ՀՀ ոստիկանության Դիլիջանի քննչական բաժանմունքի ավագ քննիչ Սմբատ Սաղաթելյանի՝ քրեական գործ հարուցելու մերժման մասին որոշումը, եւ գործը ուղարկել նախաքննության: Այս ընթացքում ավագ քննիչ Սմբատ Սաղաթելյանը նախաքննություն կատարելով՝ որոշել էր հանցակազմի բացակայության պատճառով քրեական գործի վարույթը կարճել: Այդ կարճումը վերացնելու համար Սաքունցը կրկին դիմել էր Տավուշի մարզի առաջին ատյանի դատարան:

Այս մասին «Առավոտը» գրել է դեռ 4-5 ամիս առաջ. «Սաքունցի հայցը նորից բավարարվեց. ոստիկանությունում քաղաքացիների բռնության ենթարկելու գործի քննությունը նորից կսկսվի» http://www. aravot.am/old/am/articles/regions/95768/view:

Նոյեմբերի 25-ին՝ Իջեւանում դատավոր Ռաֆիկ Մելքոնյանը շարունակեց այդ հայցով դատը: Սաքունցը դատարանում հայտնեց, որ ավագ քննիչ Սաղաթելյանին բացարկ է հայտնել, որովհետեւ մինչ այդ նա քրեական գործը կարճել է եւ չէր կարող օբյեկտիվ լինել եւ նախաքննության ընթացքում այդ պատճառով է հրաժարվել նրան այդ գործով բացատրություններ տալ: Սաքունցը գտնում է՝ քանի որ գործը վերաբերում է ոստիկանների կողմից գործադրված բռնությանը, գործը պիտի քննվի Հատուկ քննչական ծառայությունում: Դատավոր Ռաֆիկ Մելքոնյանի հարցին ի պատասխան՝ Սաքունցը ասաց, որ հիմա Վլադիմիր Տոնոյանը չի բողոքում, սակայն չի էլ հերքում, որ նախկինում իր հանդեպ բռնություն է կիրառվել, որ նա գողության համար պատիժը կրելուց հետո ազատության մեջ է, սակայն վախենում է իր հանդեպ ոստիկանության վերաբերմունքից: Գործը հսկող դատախազ Արարատ Ազիբեկյանն ասաց, որ կա կոնկրետ քրեական գործ, որի վերաբերյալ քննիչը համակողմանի քննություն է կատարել եւ ոստիկանների կողմից բռնության կիրառումը չի ապացուցվել: Սաքունցն էլ պնդեց, որ թեեւ գողության համար պատիժը կրած Տոնոյանը այժմ չի բողոքում, սակայն կա հանրային շահ, որը պահանջում է՝ հանցագործությունը չպետք է թաքցվի: Սաքունցը զուգահեռ անցկացրեց. երբ անմեղսունակ անձը բռնության է ենթարկվում, նա չի կարող եւ չի բողոքում, սակայն հանրային շահը պահանջում է բացահայտել հանցագործությունը: Դատը շարունակվեց նոյեմբերի 28-ին, իսկ երեկ դատավոր Ռաֆիկ Մելքոնյանը հրապարակեց վճիռը, որով մերժեց Սաքունցի հայցը:

Աղբյուրը՝ «Առավոտ» օրաթերթ
http://www.aravot.am/2011/11/30/12313/