Ես հետևություններ վաղուց եմ արել. Ա. Սաքունց

Ես հետևություններ վաղուց եմ արել: «Առաջին լրատվական»-ի հետ զրույցում, մեկնաբանելով Վ. Գասպարյանի մամուլում հրապարակված այն մեկնաբանությունը, թե Ա. Սաքունցը պետք է հետևություններ անի, ասաց ՀՔԱ Վանաձորի գրասենյակի նախագահ Արթուր Սաքունցը: 

«Իմ արած հետևությունն այն է, որ ՀՀ-ում պետք է պետական համակարգերը գործեն Սահմանադրությամբ և ՀՀ միջազգային պարտավորությունների շրջանակում, որի հիմքում ընկած է մարդը, որպես գերագույն արժեք, և նրա արժանապատվության պաշտպանությունը, որը պետք է լինի բոլոր իրավական ակտերի և իրավական ակտերով պետական գործառույթների իրականացման հիմքում»,- մանրամասնեց հետևությունը Ա. Սաքունցը`հավելելով, որ այն միակն է, որը վաղուց է արել և չի փոխել: 

Իրավապաշտպանը նշեց, որ իրավապաշտպանների կողմից բոլոր գործողությունները մարդու իրավունքների պաշտպանությանն են ուղղված և ուղղված չեն որևէ պաշտոնատար անձի դեմ: Նրա տեղեկացմամբ` իրենց գործողությունների հիմքում ընկած է մարդու խախտված իրավունքների վերականգնման պաշտպանությունը, բոլոր գործողությունների նպատակը խախտված իրավունքների վերականգնումն է: «Մեր շարժառիթները իրավապաշտպանական արժեքներն են, ոչ թե որևէ պաշտոնատար անձի նկատմամբ գործողությունները: Պետք է կառույցներն իրենց գործառույթները պատշաճ կերպով կատարեն, որպեսզի դրանք չհանգեցնեն մարդու իրավունքների խախտմանը»,- նշեց Ա. Սաքունցը: 

Անդրադառնալով նաև Վ. Գասպարյանի նշած գրանտակերությանն`ասաց, որ քաղաքացիական հասարակության կառույցների գործառույթների թյուր ըմբռնում կա պաշտոնատար անձանց կողմից, իհարկե ոչ բոլորի: «Զարմանալիորեն կան կառույցներ, որոնք շատ լավ ընկալում են և կարողանում են երկխոսություն ծավալել իրավիճակի շտկման ուղությամբ: Ինչքան կառույցներ նաև կան, որոնց ներկայացուցիչները չեն կարողանում կամ չեն հասկանում, կամ վախենում են, թե գործողությունների արդյունքում կարող են փաստեր ի հայտ գալ, որոնք բոլորովին լավ ձևով չեն ներկայացնի տվյալ գործողությունները կատարած պաշտոնատար անձին»,- նշեց իրավապաշտպան Արթուր Սաքունցը: 

Հիշեցնենք, որ ՀՔԱ Վանաձորի գրասենյակը նոյեմբերի 10-ին Վլադիմիր Գասպարյանի կողմից կազմակերպության պատվին, արժանապատվությանը եւ գործարար համբավին պատճառված վնասի հատուցման պահանջի մասին հայցադիմում է ներկայացրել ՀՀ Արաբկիր եւ Քանաքեռ-Զեյթուն համայնքների ընդհանուր իրավասության դատարան: