«Աջակցություն Հայաստանին» հիմնադրամի ներկայացուցիչներն այցելեցին Հայաստան

«Աջակցություն Հայաստանին» հիմնադրամը (Stichting Armenhulp Armenie) երկար տարիներ աջակցել է հայ երեխաներին մասնավորապես Լոռու մարզում, որը 1988 թ. երկրաշարժից հետո համարվում է աղետի գոտի:

2007 թ. հիմնադրամը սկսել է համագործակցել Հելսինկյան Քաղաքացիական Ասամբլեայի Վանաձորի գրասենյակի հետ: 

Այս տարի եւս, սեպտեմբերի 11-26-ը հիմնադրամի ներկայացուցիչներ Ֆրանս վան Հասելթը և Թեո Վինեման այցելեցին Հայաստան:

Հայաստանում գտնվելու ընթացքում հիմնադրամի ներկայացուցիչները ՀՔԱ Վանաձորի աշխատակիցների հետ համատեղ մի շարք այցելություններ կատարեցին Վանաձորի նյարդահոգեբուժական հաստատություն և Սպիտակ քաղաքի երկու դպրոց:    

Մինչ այդ ՀՔԱ Վանաձորի գրասենյակն այցելել էր այս հաստատություններ կարիքի գնահատման համար և արդյունքում առաջարկել էր աջակցել Վանաձորի նյարդահոգեբուժական հաստատությանն ու Սպիտակի թիվ 1 հատուկ և թիվ 5 հանրակրթական դպրոցներին:

Նրանք աջակցեցին թիվ 1 հատուկ դպրոցին` տրամադրելով անկողնային սպիտակեղեն, կոշիկներ և սեղանի խաղեր երեխաների համար և տաքացուցիչներ ու սփռոցներ ճաշարանի համար:

Թիվ 5 հանրակրթական դպրոցին նրանք տրամադրեցին սնունդ (պանիր, ալյուր, մակարոն, բրինձ, հավ և այլն), 18 էլեկտրական տաքացուցիչ և վերանորոգեցին դասասենյակների հատակները:

Աջակցություն ստացած երրորդ հաստատությունը Վանաձորի նյարդահոգեբուժական հաստատությունն էր, որտեղ լոգարաններն ու զուգարաններն առանձնացվեցին և վերանորոգվեցին:

Հիմնադրամը Սպիտակում և Վանաձորում աջակցություն էր տրամադրել նաեւ 2007 և 2009 թթ.:

Պետք է նշել, որ «Աջակցություն Հայաստանին» հիմնադրամը սկսել է գործել 2005 թ. Ադրի Վիթվենի, Ջենեթ Սոնեվելդի և Թեո Վենեմանի ջանքերով: Հիմնադրամը ստեղծվել է Հայաստանի ժողովրդին սննդով, տուն/դպրոցով և բժշկական օգնությամբ աջակցելու նպատակով: