ՊՆ-ն ուզում է ասել, որ բանակի մասին ցանկացած հրապարակայնացում կարող է լինել միայն իրենց թույլտվության սահմաններում. Իրավապաշտպան

Հելսինկյան Քաղաքացիական Ասամբլեայի Վանաձորի գրասենյակի ղեկավար, իրավապաշտպան Արթուր Սաքունցը համոզված է, որ եթե բանակում առկա թերությունների մասին բարձրաձայնող երիտասարդը լրատվամիջոցների ներկայացուցիչների հետ հանդիպում է ոչ ավել-ոչ պակաս` ՊՆ-ի նախաձեռնությամբ, ապա միանշանակ է, որ նրան հետագա պատասխանատվության չեն կանչի: Նման տեսակետ իրավապաշտպանը հայտնեց «Առաջին լրատվական»-ի հետ զրույցում:

«Պաշտպանության նախարարությունը, որ մինչ այժմ քննադատում և իր գնահատականն էր տալիս բանակում առկա իրավիճակի մասին բարձրաձայնող հասարակական կազմակերպություններին` ասելով, որ վերջիններս «խփում են» նրան, այժմ սկսում է ի՞նքը խփել հայոց բանակին: Ես այդպես կարող եմ եզրակացնել: Բայց ՊՆ-ն պետք է հրապարակային գնահատականներ տա իր նախորդ ասածներին: Թե՞ հիմա նա նույն կերպ է աշխատում, ինչպես հասարակական կազմակերպությունները: Այդ դեպքում ինքն այլ տարբերակ չունի, քան բանակում առկա անարդարությունների մասին խոսող զինծառայողի հետ մամուլի ասուլիս կազմակերպելու միջոցով պայքարել ԶՈՒ-ում առկա թերությունների դեմ: Դա նշանակում է, որ ՊՆ-ն այլևս անելիք չունի: Թող գան այն մարդիկ, ովքեր կարող են համապատասխան գործառույթներ իրականացնել, կամ էլ այդ ասուլիսը կազմակերպողները գնան հասարակական դաշտ և սկսեն որպես հասարակական նախաձեռնություն աշխատել: Եթե ՊՆ-ն նման ասուլիս է կազմակերպում, դա արդեն իսկ երաշխիք է, որ այդ տղային ոչինչ էլ չի լինի, դա միանշանակ է: Լրացուցիչ քննարկման հարց է, թե ինչ հիմքով և ով է զինծառայողի հանդեպ նրա ծառայության 8-րդ ամսում քրգործ հարուցել»,- նկատեց Սաքունցը:

Նա նաև հիշեց, որ ամիսներ առաջ ԼՂՀ-ում` «Եղնիկներում» զինվորներին ծեծող սպայի դեպքում պաշտպանության նախարարը ոչ թե ողջունեց համացանցում նման տեսանյութի հայտնվելը, այլ միանգամից հարց հնչեցրեց` ով է նման տեսանյութ տեղադրել: «Հիմա նույն վերաբերմունքը չկա: Կամ պաշտպանության նախարարն է էապես փոխվել, դարձել է ավելի թափանցիկ, կամ էլ իրենք ուղղակի ասում են, որ բանակի մասին ցանկացած հրապարակայնացում կարող է լինել միայն իրենց թույլտվության սահմաններում»,- ամփոփեց իրավապաշտպանը: 

Հիշեցնենք, որ ՊՆ-ն այսօր հանդիպում էր կազմակերպել հայաստանյան մի քանի ԶԼՄ-ների և վերջերս «Չենք լռելու» երիտասարդական նախաձեռնության տարածած ձայնագրության հերոսի` բանակի զինծառայող Հովհաննես Եսայանի միջև:

Հիշեցնենք, որ երիտասարդը զանգահարել էր նախաձեռնության անդամներին և դժգոհել իրենց զորամասում տիրող անարդարություններից:

Աղբյուրը` http://1in.am/arm/armenia_right_41390.html