Ուշացնում են

Երեկ Կենտրոն եւ Նորք Մարաշ վարչական շրջանների ընդհանուր իրավասության դատարանում պետք է քննվեր ս/թ հունիսի 14-ին Երեւանի մետրոյի «Գարեգին Նժդեհ հրապարակ» կայարանի մուտքի մոտ ոստիկանի արձակած կրակոցից սպանված Արման Ենգիբարյանի ներկայացուցիչ փաստաբան Էդմոն Մարուքյանի բողոքը` ընդդեմ ՀՀ Հատուկ քննչական ծառայության:

Ենգիբարյանի սպանության վերաբերյալ տեղի ունեցած ծառայողական քննության արդյունքում ՀՔԾ-ն ոստիկանի գործողությունները գնահատել էր իրավաչափ եւ այդ մասով գործը կարճել: Դրանից հետո Էդմոն Մարուքյանը դիմել էր դատարան` վիճարկելու ՀՔԾ-ի նշված որոշումը:

- Պարոն Մարուքյան, դատական նիստը կայացա՞վ:

- Ոչ, այն հերթական անգամ հետաձգվեց: Արդեն երրորդ անգամ է հետաձգվում է: Ասում են, որ նյութերը քննիչը դեռ չի տվել, նյութերը դատարանը դեռ չի ստացել, եւ նիստը հետաձգվում է, մինչեւ որ դատարանը ստանա նյութերը  եւ կարողանա ուսումնասիրել դրանք: Հաջորդ նիստը կլինի նոյեմբերի 1-ին, ժամը 11.30-ին:

- Ի՞նչ եք կարծում, Հատուկ քննչական ծառայությունը միտումնավո՞ր է ձգձգում դատարանին գործի նյութերը փոխանցելու գործընթացը:

- Խնդիրն այն է, որ գործը կարճելուց հետո ՀՔԾ-ն այդ  նյութերը ուղարկել է ոստիկանության Երեւան քաղաքի վարչություն, այնտեղ, որտեղ քննվում է ավազակային հարձակումների վերաբերյալ գործը: Նյութերը դատարանին տրամադրելու վերաբերյալ գրությունը դատարանը նախ ՀՔԾ էր ուղարկել, հետո միայն` ոստիկանության Երեւան քաղաքի վարչություն:

-Ի՞նչ եք կարծում, դատարանը կբավարարի՞ ձեր բողոքը:

- Կարծում եմ` այո, որովհետեւ մեր բողոքը հիմնավոր է, եւ դատարանը պետք է վերացնի քրեական գործի կարճման որոշումը, քրեական գործը պետք է նորից քննվի:

Աղբյուրը՝ http://armtimes.com/29011
Անի Գեւորգյան