ՊՆ փոխնախարարին պաշտոնա՞նկ կանեն

Վերջին շրջանում բանակում միմյանց հաջորդած ինքնասպանություններից հետո հասարակական կազմակերպությունների բարձրացրած բողոքը պատճառ է դարձել նաեւ պաշտպանության նախարարության  երկփեղկմանը:

Նախաձեռնող խմբերի ընդվզումն ու դրան հաջորդած պաշտոնյաների արձագանքը նոր խարդավանքների տեղիք են տվել: Լարվել են պաշտպանության փոխնախարարներ Դավիթ Տոնոյանի եւ Վովա Գասպարյանի հարաբերությունները: ՊՆ-ին մոտ կանգնած մեր աղբյուրների փոխանցմամբ, ամեն ինչ սկսվել է ուրբաթ օրը Դավիթ Տոնոյանի մոտ կայացած հանդիպումից, որին մասնակցել են «Բանակն իրականում» նախաձեռնության ներկայացուցիչները՝ Արթուր Սաքունցի գլխավորությամբ:

Մինչդեռ Վովա Գասպարյանն օրեր առաջ կասկածներ էր հայտնել Սաքունցի նախաձեռնության իրական նպատակի կապակցությամբ, թե դա «դրսից ֆինանսավորվող  կասկածելի նպատակներով ստեղծված ՀԿ» է: Եվ բացի այդ, խոցվել էր ակցիայի ժամանակ ՊՆ ղեկավարությանն ուղղված կոչերից եւ ոչ կոռեկտ արտահայտություններից: ՀԿ-ՊՆ թշնամական վերաբերմունքի այս ֆոնին մյուս փոխնախարար Դավիթ Տոնոյանն իր նախաձեռնությամբ հանդիպում էր կազմակերպել «Բանակն իրականում» նախաձեռնության հետ: Ավելին, ի հեճուկս Գասպարյանի եւ պահպանողական գեներալիտետի, ողջունել էր քաղաքացիական նախաձեռնությունները, իսկ դրամաշնորհներն անհրաժեշտ համարել, քանի որ դրանց արդյունքում փորձագիտական վերլուծություններ են կատարվում, որոնք օգնում են պաշտպանության նախարարությունում եւ ընդհանրապես բանակում բարեփոխումների առումով:

Տոնոյանի այս մոտեցումը սառը ցնցուղի նման մի բան է եղել Սեյրան Օհանյանի, Վովա Գասպարյանի ու նրանց կողմնակիցների   համար: Հատկապես հունից հանել է այն, որ Սաքունցը պահանջել է վերաբերմունք հայտնել Վովա Գասպարյանի արած արտահայտությունների առնչությամբ, Տոնոյանն էլ  խոստացել է, որ կխոսի նախարար Սեյրան Օհանյանի հետ, եւ փոխնախարարի հայտարարությունների հետ կապված՝ գերատեսչությունը կարտահայտի որոշակի դիրքորոշում: Ինչն ընկալվել է որպես կասկածի տակ առնել Գասպարյանի՝  ՀԿ-ին ուղղված «մերկացումները»: Այս բողոքները հասել են Սեյրան Օհանյանին, որը բուժվելու նպատակով մի քանի օր արտասահմանում է եղել:

Նախարարը նեղսրտել է Տոնոյանի՝ Սաքունցի հանդեպ ցուցաբերած հարգալից ու բարեկամական վերաբերմունքից: Մեր աղբյուրի փոխանցմամբ՝ «պահպանողական» գեներալիտետն առաջադեմ, եվրոպամետ Տոնոյանի հանդեպ պարզապես թշնամացել է եւ Օհանյանին տրամադրել նրա դեմ՝ պահանջելով, որ անհրաժեշտ է խիստ մոտեցում: Երեկ Սեյրան Օհանյանը վերադարձել է, ասում են՝ հնարավոր է բավարարվեն խիստ նկատողությամբ, չնայած մի ստվար զանգված պահանջում է խիստ պատիժ՝ ընդհուպ պաշտոնանկություն: Անկախ այն բանից, թե ՀԿ-ների հարցում ոչ միասնական մոտեցում ցուցաբերած տեղակալներն ինչ վերաբերմունքի կարժանանան, Վովա Գասպարյանն արդեն դաշտում գտել է իր «սրտացավ» ՀԿ-ին:

Օրերս նա էլ հյուրընկալել է «Չենք լռելու» կազմակերպությանն ու խոստումներ շռայլել: Այս կազմակերպությունն էլ հո չէ՞ր լռելու, իր սկզբունքին համաձայն՝ արդեն  հայտարարություն է տարածել: Ինչպես ասում են՝ Տոնոյանի «ինադու» Գասպարյանը գործնական քայլերի է անցել: Կարճ ասած՝ իրար հաջորդած ինքնասպանություններն ու «հասարակական ընդվզումը» լակմուսի թղթի նման բացահայտեցին  պաշտպանության համակարգում տիրող փոխհարաբերություններն ու խարդավանքները:

Աղբյուրը՝ http://www.hraparak.am/2011/10/25/pashtpanutyan-poxnaxarar/