Հանրային Խորհուրդը փորձում է ՊՆ-ի լավ աշխատանքի իմիտացիա ստեղծել. Արթուր Սաքունց

ՊՆ առնթեր Հանրային խորհուրդն, ըստ իրավապաշտպան Արթուր Սաքունցի, ստեղծվել է նախարարության դեմքը փրկելու և քաղաքացիական մասնակցության իմիտացիա ստեղծելու համար:

Եվ  դա ապացուցեց ինքը` ՀԽ նախագահ Գեղամ Հարությունյանը՝ այսօր լրագրողների հետ հանդիպման ժամանակ հնչեցված մի շարք հայտարարություններով:

Հիշեցնենք, որ Հարությունյանը հայտարարել էր, թե իրավապաշտպանները պախարակում են բանակը և որ իրականում վիճակագրության համաձայն՝ բանակում սպանությունների դեպքերը պակասել են:

«Նախ, պաշտպանության նախարարն ինքն  իր սեպտեմբերյան զեկույցում  նշեց, որ ոչ կանոնադրային հարաբերությունների խախտման դեպքերի աճ կա: Այսինքն, մենք իմանում ենք միայն մահվան դեպքերի, այն էլ՝ ոչ բոլորի մասին, սակայն խախտումները իրականում շատ ավելի են: «Վիճակագրությունը» մեջբերելով՝ Գեղամ Հարությունյանը հակասում է հենց իր վերադասի` նախարարի խոսքին: Թող նախ նախարարի հայտարարությունը կարդա: Այսինքն,  հասարակությանն անիրազեկության մեջ պահելով՝ Հանրային խորհուրդը փորձում է իմիտացիա ստեղծել, թե լավ են աշխատում, թե՝ տեսեք, մահերը քչացել են, ուրեմն լավ ենք աշխատում: Ոչ կանոնադրային հարաբերությունների պատճառով ոչ մի մահ չպիտի լինի: Այս հայտարարությունը աբսուրդ է»,- ասում է Սաքունցը:

Հիշեցնենք, որ Գեղամ Հարությունյանն այսօր կայացած ասուլիսի ընթացքում նաև իր վրդովմունքն էր հայտնել հասարակություն- բանակ հարաբերություններում իրավապաշտպանների միջամտության կապակցությամբ: Նրա խոսքով`  իրավապաշտպանները դրդում են ծնողներին բողոք ներկայանել և պաշտպանել իրենց իրավունքները:

«Քաղաքացուն առաջարկելը, որ բողոքի, նշանակում է օգնել, որ նա իր իրավունքները պաշտպանի: Մեղադրել դրանում՝ նշանակում է հանցագործությունը թաքցնել: Բանակի խնդիրները վերհանողներին, քննադատողներին մեղադրելով՝ իրենք են պախարակում բանակը, քանի որ ծածկում են  բանակի կեղտերը»,- ասում է Արթուր Սաքունցը:

Աղբյուրը` http://ilur.am/?p=