Վ. Գասպարյանին դատի են տվել

Պաշտպանության փոխնախարար Վլադիմիր Գասպարյանը շուտով դատարանում պատասխան կտա լրատվամիջոցներից մեկով արված իր սպառնալիքների համար:

Նրան դատական պատասխանատվության կանչելու մտադրություն ունի Հելսինկյան Քաղաքացիական Ասամբլեայի Վանաձորի գրասենյակի նախագահ Արթուր Սաքունցը: Փոխնախարարը նրան եւ Գյումրիի «Ասպարեզ» ակումբի ղեկավար Լեւոն Բարսեղյանին սպառնացել էր, որ բանակի առնչությամբ նրանց ակտիվ գործունեությունը շարունակելը կդիտարկի որպես ոտնձգություն Զինված ուժերի նկատմամբ եւ դրանց կտրվեն իրավական լուծումներ:

«Պաշտոնատար անձն ինքը իրավունք չունի նման կերպ արտահայտվել կարծիքի արտահայտման դեմ»- «Ա1+»-ին պարզաբանեց Հելսինկյան Քաղաքացիական Ասամբլեայի Վանաձորի գրասենյակի նախագահ Արթուր Սաքունցը:

«Ասպարեզ» ակումբի ղեկավար Լեւոն Բարսեղյանն էլ հաստատում է, որ անձամբ է կարդացել Վլադիմիր Գասպարյանի այն տեքստը, որում վերջինս բանակի խնդիրներով մտահոգ հասարակական կազմակերպությունների ներկայացուցիչներին անվանել է «թուլա»։

«Մարդը, որը հրապարակավ ասում է, որ նախարարին «թույլ» ասողները «թուլա» են, պատկերացնում եմ, թե ոչ հրապարակային միջավայրում, բանակային միջավայրում, զորամասային միջավայրում ինչ բառապաշար է օգտագործում»,- նշեց Գյումրիի Ժուռնալիստների «Ասպարեզ» ակումբի ղեկավար Լեւոն Բարսեղյանը:

Նա ասում է, որ փոխնախարարը լավ կլիներ, զբաղվեր բանակում գրանցված սպանությունները բացահայտելու գործով, եթե չէ, կարող է հանրօգուտ աշխատանք կատարել այլ բնագավառներում՝ «ասենք, անասնապահությամբ զբաղվի, ինչ-որ մի ծիրան աճեցնի, արտահանի Ռուսաստան»,- ասաց Լեւոն Բարսեղյանը:

Իսկ ընդհանուր առմամբ, պարոն Բարսեղյանը փոխնախարարին տեղեկացնում է` «Եթե շատ եք ուզում մեզանով զբաղվել, դիմեք դատախազություն։ Մենք փախած չենք, մենք էստեղ կանգնած ենք»:

Ի դեպ, Արթուր Սաքունցն էլ իր հերթին զգուշացնում է, որ Վլադիմիր Գասպարյանն «իրավունք չունի խցկվել քաղաքականության մեջ»:

Աղբյուրը՝ http://www.a1plus.am/am/politics/2011/10/20/vladimir-gasparyan