ՔԿՀ-ներում վերահսկողություն իրականացնող հասարակական դիտորդները պատրաստակամ են շարունակել ոլորտի բարեփոխումներին միտված իրենց գործունեությունը. Ա. Սաքունց

ՀՀ արդարադատության նախարարության քրեակատարողական հիմնարկներում և մարմիններում վերահսկողություն իրականացնող հասարակական դիտորդների խումբը՝ ի դեմս նորընտիր նախագահ, Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցի, պատրաստակամ է շարունակել ոլորտի բարփոխումներին միտված իր գործունեությունը` չնայած ճանապարհին հանդիպող բազմաթիվ խոչընդոտներին: Այս մասին «Առաջին լրատվականի» հետ զրույցում ասաց ինքը` Արթուր Սաքունցը:

«Իմ նախագահության նախորդ շրջանում խմբի պլանային այցերը կատարվել են լիարժեքորեն, այլ բան է, որ մեր կողմից բարձրաձայնված խնդիրների մեծ մասն այդպես էլ լուծում չի գտել: Վերջնական կարգավորումներ չեն առաջարկվել, սակայն սա չի կարող հիմք ծառայել, որ մեր դիտորդական խումբը թևաթափ լինի և դադարեցնի իր աշխատանքները: Մեր առաքելությանը ոչ մի բան չի կարող խանգարել, և եթե այսօր մեզ մոտ այսինչ բանը չի ստացվում, դա դեռ չի նշանակում, որ մենք պետք է հուսահատվենք: Մենք այսուհետ ևս, բնականաբար, շարունակելու ենք մեր աշխատանքները և փաստելու ենք ոլորտում առկա թերացումների մասին: Խմբի մանդատը հնարավորություն է ընձեռում ցանկացած պահի լինել ցանկացած ՔԿՀ-ում և դիտարկումներ իրականացնել` այսկերպ իրավապաշտպան գործունեություն ծավալելով»,- ամփոփեց Արթուր Սաքունցը: 

Նշենք, որ Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը ՀՀ արդարադատության նախարարության քրեակատարողական հիմնարկներում և մարմիններում վերահսկողություն իրականացնող հասարակական դիտորդների խմբի նիստում խմբի նախագահ վերընտրվել էր 2011թ. հոկտեմբերի 15-ին:

Աղբյուրը` http://www.1in.am/arm/armenia_society_38082.html