Կոչումները տալիս եք բանակում սպանությունների թվի ավելացմա՞ն համար

Հայաստանի Անկախության հռչակման տոնի առթիվ Գլխավոր գերագույն հրամանատար Սերժ Սարգսյանը գեներալի, գեներալ-լեյտենանտի կոչումներ տվեց Լոռու կայազորի զինվորական դատախազ Թեւոս Միրզաբեկյանին, պաշտպանության փոխնախարար Վլադիմիր Գասպարյանին, գլխավոր շտաբի պետի տեղակալ Վալերի Գրիգորյանին, Վ.Սարգսյանի անվան ռազմական, ակադեմիայի տնօրեն Մարտին Կարապետյանին, նախարարի՝ սպառազինությունների գծով տեղակալ Աբրահամյանին:

Հայրենիքին մատուցած ո՞ր ծառայությունների համար են նրանք պարգեւատրվել, երբ բանակում շարունակվում են ժամկետային եւ պայմանագրային զինծառայողների սպանությունները, եւ առկա է հասարակական բողոքի ալիք, նախագահի հրաժարականի հարց՝ բանակում տիրող իրավիճակի պատճառով:

Նման հարցադրումներ է բարձրացնում Հելսինկյան Քաղաքացիական Ասամբլեայի Վանաձորի գրասենյակը՝ հավելելով հանրությանը հետաքրքրող մի քանի հարցեր: Մասնավորապես՝ Ռազմական ակադեմիան, որը համարվում է ԶՈՒ-ի սպաների կրթման դարբնոց, քանի՞ շրջանավարտ Է տվել վերջին 5 տարիների ընթացքում եւ նրանցից քանիսն են մինչ օրս շարունակում ծառայությունը բանակում (մեր տեղեկություններով՝ 1200-1300):

Վանաձորի Դուցի գնդի հրամանատար նշանակված 34-ամյա Արտյոմ Ամբատյանը արդյո՞ք գլխավոր շտաբի պետ Յուրի Խաչատուրովի որդու՝ Գրիշա Խաչատուրովի հետ ակադեմիան ավարտած առաջին կադրերից Է (նրանց 12-ի ախպերություն կամ «բրատվա» էին ասում): Արդյո՞ք Արտյոմ Սմբատյանի հետ չէին կապվում որոշ խոսակցություններ, որ նա ստիպում է զինծառայողներին՝ իրենց անունով վարկ վերցնել բանկից եւ տալ իրեն: Տեղեկություններ կան նաեւ, որ Լոռու մարզի կայազորի զինդատախազ Վալերի Միրզաբեկյանը ՀՀ նախագահի աշխատակազմի վերահսկողության ծառայության պետ Հովսեփյանի փեսան է:

ՀՔԱՎ-ի գրասենյակը պարզաբանումներ է խնդրում նախագահականից եւ Պաշտպանության նախարարությունից:

Աղբյուրը՝ «Ժամանակ» օրաթերթ
2011 թ. հոկտեմբերի 11