«Զրպարտության մասին» օրենքի ապաքրեականացումը ազատ խոսքի «հերը կանիծի». Ա. Սաքունց

Եթե նախկինում լրատվամիջոցներին լռեցնում էին բռնի մեթոդներով, ապա այժմ, ի դեմս «Զրպարտության մասին» օրենքի ապաքրեականացման, դա արվում է ավելի քաղաքակիրթ ձևով, իրավական մեխանիզմներով:
«Առաջին լրատվական»-ի հետ զրույցում այս մասին ասաց Հելիսնկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը` անդրադառնալով «Ժամանակ» օրաթերթի հիմնադիր «Սկիզբ Մեդիա Կենտրոն»-ի դատական գործով Վերաքննիչ քաղաքացիական դատարանի կայացրած վճռին:/

«Զրպարտության մասին» օրենքի ապաքրեականացմամբ փորձ է արվում չկառավարվող լրատվամիջոցներին տանել սնանկացման ճանապարհով: Դատական կարգով այս կամ այն պաշտոնյայի օգտին մամուլից գումարներ բռնագանձելու պրակտիկան, ի վերջո, կհանգեցնի նրան, որ բոլորը կվախենան կարծիք արտահայտել, թերթերում ինքնագրաքննադատություն կսկսվի, և լրատվամիջոցների խմբագիրները ստիպված կլինեն բոլոր հոդվածներում ուշի ուշով զրպարտանքի տարրեր ման գալ: Սա ազատ խոսքի «հերը կանիծի»` սկիզբ դնելով տխուր և դժգույն պրակտիկայի: Կատարվողը ոչ այլ ինչ է, եթե ոչ` ազատ խոսքի սահմանափակում և դրա վրա ճնշման մեխանիզմներ բանեցնելու փորձ»,- ամփոփեց Սաքունցը:

Հիշեցնենք, որ Սեդրակ և Բելլա Քոչարյաններն ընդդեմ «Ժամանակ» օրաթերթի հիմնադիր «Սկիզբ Մեդիա Կենտրոն»-ի դատական գործով Վերաքննիչ քաղացիական դատարանն այսօր հրապարակեց դատական ակտը: Ըստ այդմ` դատարանը մերժեց «Սկիզբ Մեդիա Կենտրոն» ընկերության վերաքննիչ բողոքը` ուժի մեջ թողնելով Առաջին ատյանի դատարանի վճիռը:

Նշենք, որ Ռոբերտ Քոչարյանի ընտանիքը դատական հայց էր ներկայացրել «Ժամանակ» օրաթերթի հիմնադիր «Սկիզբ Մեդիա Կենտրոն» ՍՊԸ-ի դեմ` պարբերականին մեղադրելով Քոչարյանների բարի համբավը արատավորելու մեջ: Քոչարյանների ընտանիքը 6 մլն դրամի փոխհատուցում էր պահանջում օրաթերթից՝ 3 մլն-ը դատական ծախսերի համար, իսկ մյուս 3 մլն-ը՝ որպես բարոյական վնասի փոխհատուցում: Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը բավարարել է հայցվորների փոխհատուցման պահանջը` որոշելով հօգուտ նրանց 3 միլիոն փոխհատուցել` պահանջված 6-ի փոխարեն:

Աղբյուրը՝ http://1in.am/arm/armenia_right_37096.html