Իրավապաշտպանները մեկ շաբաթվա ընթացքում կներկայացնեն առաջարկների փաթեթը. նրանք առաջարկում են ներդնել նաեւ Ռազմական օմբուդսմենի ինստիտուտը

Սեպտեմբերի 14-ին անցկացված «Բանակն առանց մարդասպանների» կլոր սեղանի մասնակից իրավապաշտպանները պատրաստվում են մեկ շաբաթվա ընթացքում ՊՆ-ին ներկայացնել բանակում բարեփոխումների իրականացման իրենց առաջարկաները:

Այդ մասին «Մեդիալաբի» հետ զրույցում տեղեկացրեց իրավապաշտպան Արթուր Սաքունցը` հավելելով, որ առաջարկները շատ են, որոնք ներառում են ռազմական օմբուդսմենի ինստիտուտի ներդրումը, նոր այլ ինստիտուտների ներդրումը, նախաքննական գործընթացների հետ կապված որոշ փոփոխություններ անելու առաջարկներ եւ այլն:

«Մեր պահանջները հստակ են, խնդիրները, որոնք կան բանակում, դրանց բոլորի կապակցությամբ մեզ պետք է տրվի հստակ, տրամաբանական պատասխան, փաստաթղթավորված, որտեղ ՊՆ-ն պետք է տեղեկացնի, թե ինչ է անելու առանձին դեպքերում»,- նշեց Սաքունցը` հավելելով, որ հակառակ դեպքում իրենք ակցիաներ են սկսելու:

Ինչ վերաբերվում է այն խոսակցություններին, թե բանակում տեղի ունեցող միջադեպերի հետ կապված մեծ աղմուկը հատուկ հրահրվում է Սեյրան Օհանյանի դեմ, ապա դրանք Սաքունցը անհիմն է համարում:

Սաքունցի խոսքով, հնարավոր է, որ նման տեսակետների հեղինակները հենց Սեյրան Օհանյանի շրջապատն է, քանի որ, ըստ նրա, բանակում կա անմխիթար վիճակ, իսկ Պաշտպանության նախարարը Սեյրան Օհանյանն է:

«Բացի այդ, մենք մեր քննադատության թիրախը բարձրացրել ենք, եւ ՊՆ-ից պացի քննադատում ենք նաեւ Գերագույն գլխավոր հրամանատարին, եւ ոչ թե Սեյրան Օհանյանի, այլ` նրա հրաժարականի մասին ենք խոսելու»,- նշեց իրավապաշտպանը:

Արթուր Սաքունցը նաեւ հավելեց, որ օրենսդրությունը այսօր որեւէ կերպ չի խանգարում նոր ինստիտուտների ներդրմանը բանակում, ինչի մասին այս օրերին արդեն տեսակետներ են հնչել:

Իրավապաշտպանը նշեց, որ Սահմանադրությունը չի սահմանափակում Օմբուդսմենների թիվը, ինչը նշանակում է, որ օրենսդրորեն հնարավոր է Ռազմական օմբուդսմենի ինստիտուտի ներդրումը:

Աղբյուրը՝ www.medialab.am