Քննարկվեց ՀՀ սոցիալ-տնտեսական ու քաղաքական վիճակը

«2008թ-ին ՀՀ մուտք է գործել 1 մլրդ 600 մլն դրամ, որից 90 տոկոսը ՌԴ-ից, 2009-ին այս թիվը կրկնակի նվազել է ֆինանսատնտեսական ճգնաժամի արդյունքում, 2010-ին 1 մլրդ 200 մլն է կազմել մուտքը, իսկ 2011-ին 35% աճ է գրանցվել:

Ստացվում է, որ մենք որպես երկիր ոչինչ չենք ստեղծում, այլ ստանում ենք արտերկրում ապրող մեր բարեկամներից»,- այս կարծիքը հայտնեց տնտեսագետ, ՀԱԿ ակտիվիստ Վահագն Խաչատրյանը Հելսինկյան ասամբլեայի Վանաձորի գրասենյակում կայացած դասընթաց-քննարկմանը:

Քննարկումն անդրադառնում էր Հայաստանի սոցիալ-տնտեսական և քաղաքական վիճակին, հրավիրված էին տարբեր կուսակցությունների և ՀԿ ներկայացուցիչներ:

ՀԱԿ ակտիվիստ Վահագն Խաչատրյանի ներկայացրած ուսումնասիրության համաձայն Հայաստանում գյուղ կա, որ դասարաններ չեն հավաքվում, իսկ մեծամասամբ, մի քանի դպրոց կցում են իրար, որ կարողանան կազմավորել գոնե մեկ դասարան: Լուրջ է համարում աղքատության խնդիրը՝ չնայած պաշտոնական վիճակագրական տվյալներով ՀՀ-ում աղքատության տոկոսը 32-ն է, այնուամենայնիվ, պարոն Խաչատրյանի խոսքով այս թիվն իրականում շատ ավելի մեծ է:

Լուծում տնտեսագետը տեսնում է հարկային դաշտի պարզեցման, գյուղացուն ցածր տոկոսադրույքով վարկեր տրամադրելու, քաղաքացու համար աշխատանքի հնարավորություն ստեղծելու մեջ: Ինչ վերաբերում է քննարկումներին, ապա Հալսինկյան քաղաքացիական ասամբլեայի Հայաստանի կոմիտեի կողմից իրականացվող «Դեմոկրատիայի դպրոց» ծրագիրը իրականացվում է արդեն 5 տարի: Կոմիտեն գործում է Երևանում, հաճախակի է կազմակերպում ինչպես երևանյան, այլնպես էլ մարզային հանդիպումներ:

Աղբյուրը՝ http://loritv.am/index.php/home/465-2011-09-17-12-55-56