«Ես զինվոր չունեմ մարդակեր բանակ ուղարկելու համար». որդեկորույս մայրերը նախագահական նստավայրում են

Քիչ առաջ կառավարության շենքի դիմաց մեկնարկեց «Սեւազգեստ բանակ» բողոքի ակցիան, որը նախորդ ակցիայից ավելի մարդաշատ է: Զոհված զինվորների հարազատներից բացի այստեղ են մի խումբ ակտիվ երիտասարդներ, հասարակական կազմակերպությունների ներկայացուցիչների, իրավապաշտպաններ:

Ակցիայի մասնակիցները շարքով կանգնել են` ձեռքներին բանակում տարբեր ժամանակներում խաղաղ պայմաններում զոհված զինծառայողների լուսանկարները, նաեւ պաստառներ. «Մի սպանեք մեր զինվորին», «Բանակը` սպանդանոց», «Հոկտեմբերի 27»,  «Արդարություն», «Մի թողեք 3 անչափահաս երեխաներին առանց հայր», «Երեխա չունենք, որ բանակում սպանեն», «Բանակն առանց մարդասպանների» կարգախոսներով: Նրանք պահանջում են դադարեցնել զորակոչն այնքան ժամանակ, մինչեւ որ բացահայտվեն զինվորների սպանությունները եւ հստակ երաշխիքներ տրվեն, որ նման դեպքերը չեն կրկնվելու:

Ոստիկանները հորդորեցին որդեկորույս մայրերին բացել կառավարության շենքի մուտքը, որը վերջիններս փակել էին:  Henaran.am-ի թղթակիցը փոխանցում է, որ բողոքի ակցիայի մասնակիցները պատրաստվում են նաեւ երթի դուրս գալ: Երթուղին դեռեւս հստակեցված չէ:

Henaran.am-ի թղթակիցը փոխանցում է, որ կառավարության շենքի մոտ կանգնելուց հետո,  ակցիայի մասնակիցները շրջան են կազմում Հանրապետության հրապարակի կենտրոնում: Այստեղից նրանք պատրաստվում են շարժվել նախագահական նստավայր: Ակցիայի մասնակիցներին են միացել «Ժառանգության» պատգամավորներ Ստյոպա Սաֆարյանը եւ Անահիտ Բախշյանը, «Սարդարապատ» նախաձեռնող խմբի անդամ Տիգրան Խզմալյանը:

Իրավապաշտպան Արթուր Սաքունցը Henaran.am-ին ասաց, որ իրենք պահանջում են «Գերագույն գլխավոր հրամանատարից մեկ ամսվա ընթացքում բացահայտել գրանցված սպանությունները եւ պատժել իրական մեղավորներին, ինչպես նաեւ հստակ երաշխիքներ տալ, որ զինված ուժերում այլեւս մահեր չեն գրանցվելու»:

Հանրապետության հրապարակից որդեկորույս մայրերի երթը հասավ ՀՀ գլխավոր դատախազություն, որտեղ լուռ կանգնեցին, ապա մայրերը հուզված պատմեցին իրենց որդիների սպանությունների պատմությունները եւ շարժվեցին դեպի Բաղրամյան պողոտա, կանգ առան Ազգային ժողովի շենքի դիմաց: Այստեղից բողոքի երթն ուղղվեց դեպի ՀՀ նախագահի նստավայր: Ոստիկանները չկարողացան արգելել բողոքավորներին` անցնել փողոցը եւ հանգրվանել նախագահի նստավայրի ճաղավանդակների մոտ: Այս պահին որդեկորույս մայրերը բորբոքված թափահարում են ճաղավանդակները: Նրանց փորձում է հանգստացնել «Ժառանգության» պատգամավոր Ստյոպա Սաֆարյանը:

Աղբյուրը՝ http://henaran.am/?p=34792