Ինչ են քննարկել փակ հանդիպմանը

Ինչպես ավելի վաղ տեղեկացրել էինք, այսօր ԱԺ  պաշտպանության, ազգային անվտանգության եւ ներքին գործերի մշտական հանձնաժողովի նախաձեռնությամբ իրավապաշտպանների հետ փակ հանդիպոմ է տեղի ունեցել, որի ժամանակ քննարկվել են բանակին առնչվող խնդիրներ:

Հանդիպման մասնակից ՀՔԱ վանաձորի գրասենյակի ղեկավար Արթուր Սաքունցը Henaran.am-ին փոխանցեց, որ հանդիպմանը ներկա են եղել պաշտպանության նախարարության, զինդատախազության, ԵԱՀԿ Երեւանյան գրասենյակի ներկայացուցիչները: Այս քննարկումը, Արթուր Սաքունցի խոսքով, նախօրեին տարածած հայտարարության արձագանքն էր:

Պատկան մարմիններն իրավապաշտպաններին են ներկայացրել այն բոլոր քայլերը, որոնք իրականացվում են բանակում առկա խնդիրները լուծելու ուղղությամբ: Բանակում արձանագրված մահվան վերջին դեպքերն առանձին-առանձին չեն քննարկվել: Խնդրին ընդհանրական անդրադարձ է եղել եւ նշվել է, որ վերջին տարիներին բանակում մահվան դեպքերի թիվը նվազել է:

Արթուր Սաքունցի խոսքով, հայտարարության մեջ բարձրացված հարցերի պատասխաններն իրենց չեն բավարարել: «Բանակում տիրող բոլոր խնդիրների մասին իրենք շատ լավ գիտեն: Այդ հանդիպման իմաստը մոտավորապես սա էր` համագործակցենք, բայց խնդիրները չհրապարակայնացնեք»,- Henaran.am-ին ասել է Արթուր Սաքունցը: Նրա դիտարկմամբ, բանակում առկա խնդիրները հարկ եղած չափով չեն հրապարակայնացվում, ինչն էլ անվստահություն է առաջացնում հասարակության մեջ:

 Իրավապաշտպանն ասաց նաեւ, որ այսօր բանակում ներքին բողոքարկման մեխանիզմները չեն գործում, ինչը շատ կարեւոր է եւ ինչի մասին վկայում է  վկայում բողոքների բացակայությունը: «Չեն բողոքում, որովհետեւ բողոքելուց հետո անվտանգության երաշխիքներ չկան»,-նկատեց իրավապաշտպանը:

Արթուր Սաքունցը տեղեկացրեց նաեւ, որ սեպտեմբերի 14-ին կկազմակերպվի կլոր սեղան-քննարկում, որին կմասնակցեն նաեւ միջազգային կազմակերպությունների ներկայացուցիչներ: Իսկ վաղը կառավարության շենքի մոտից «Սեազգեստ բանակ» նախաձեռնող խումբը երթ կանցկացնի:

Աղբյուրը՝ http://henaran.am/?p=34767