«Բանակն առանց մարդասպանների». բողոքի ակցիա կառավարության շենքի մոտ

2011 թ. սեպտեմբերի 1-ին կառավարության շենքի դիմաց տարբեր ժամանակներում խաղաղ պայմաններում զոհված զինվորների մայրերը եւ մի խումբ ակտիվիստներ բողոքի ակցիա են անցկացրել:

Ակցիայի մասնակիցները սեւազգեստ էին ի նշան որդեկորույս մայրերի համերաշխության:

«Բանակն առանց մարդասպանների» նախաձեռնությունը ծնվել է Ֆեյսբուք սոցիալական ցանցում` օգոստոսի 26-ին ԼՂ «Եղնիկներ» զորամասի զինծառայող Աղասի Աբրահամյանի մահվան մասին տեղեկության տարածումից հետո:

«Բանակն առանց մարդասպանների», «Սեփական բանակը պահել չկարողացող ժողովուրդը ստիպված  է լինելու պահել ուրիշի բանակը», «Չհայտարարված պատերազմ հայ զինվորի դեմ», «Հերիք ա լռենք» եւ այլ պաստառներով հավաքվել են մի խումբ երիտասարդներ, ակտիվիստներ եւ հասարակական կազմակերպությունների ներկայացուցիչներ:

Նրանք պահանջում են արդար դատաքննություն եւ հանցագործների բացահայտում: Այս մասին ակցիայի վայրից հայտնում է Henaran.am-ի թղթակիցը:
Ակցիան հսկում են մի խումբ ոստիկաններ: Զոհված զինծառայողների մայրերը ՊՆ նախարար Սեյրան Օհանյանին բաց նամակ կհղեն հետեւյալ հարցով .«Պարոն նախարար, խնդրում ենք պատասխանել որ օրենքով է կարգավորվում ՀՀ քաղաքացու զինվորական ծառայությունը Լեռնային Ղարաբաղում»:

Ինչպես հաղորդում է Henaran.am-ի թղթակիցը, կառավարության շենքի մոտ տեղի ունեցող ակցիան շարունակվում է: Զոհված զինվորների մայրերը եւ ակտիվիստները նշում են, որ կսպասեն մինչեւ կառավարության նիստն ավարտվի եւ նախարարները դուրս գան կառավարության շենքից: Ակցիային միացել են մի շարք իրավապաշտպան կազմակերպություններ, ինչպիսիք են «Թրանսփարենսի ինտերնեշընըլ»-ը, հասարակական գործիչներ,  իրավապաշտպաններ Ավետիք Իշխանյանը, Արթուր Սաքունցը:

«Վաղուց է հայտնի, որ բանակում սարսափելի բաներ են կատարվում: Բանակով Հայաստանի բնակչության կեսն անցնում է եւ դա նշանակում է, որ հասարակության հիմքում ական է դրված, որովհետեւ դա մի դեպք չէ, դա նշանակում է, որ այնտեղ ինչ-որ համակարգ կա, սխալ հարաբերություններ կան, որ պետք է ուղղվեն»,- Henaran.am-ին ասել է  գրող, հրապարակախոս Մարինե Պետրոսյանը:

Իսկ իրավապաշտպան Արթուր Սաքունցն ասել է, որ սա հերթական ակցիաներից չէ, որը տեղի է ունենում յուրաքանչյուր հինգշաբթի կառավարության նիստերի օրը: «Սա շարունակություն է ունենալու, սա արդեն հասարակական լուրջ ընդվզման սկիզբն է լինելու բանակում սպանությունների դեպքերի շարանի եւ դրանց չբացահայտման ու չկանխարգելելու պատճառով»,-ասել է Սաքունց` նշելով, որ Պնախարարից պահանջելու են բոլոր արձանագրված դեպքերի բացահայտում եւ օբյեկտիվ քննություն, ինչպես նաեւ երաշխիքներ, որ այլեւս նման դեպքեր չեն լինելու:

«Մասնավորապես եկող աշնանային զորակոչի հետ կապված նախարարը պարտավոր է երաշխիքները տալ, եթե ինքը զորակոչում է, որ քաղաքացիներն իրենց պարտքը կատարեն երկրի առջեւ, ինքն էլ պարտավոր է քաղաքացիների առջեւ պարտավորություն վերցնել, որ նրանք անվտանգ են ծառայելու»,-ասել է իրավապաշտպանը:

Անդրադառնալով բանակում արձանագրված սպանության վերջին դեպքին, Սաքունցը նկատել է. «Պնախարարը եւ զինդատախազն անձամբ են գնացել դեպքի վայր, բայց մյուս դեպքերում էլ պետք է անձամբ լինեին այնտեղ: Եվ երբ իրենք հայտարարում են, որ անձամբ են հետեւում գործի քննությանը, նշանակում է, որ մինչ այդ չեն հետեւել: Սա ինքնախոստովանություն է»:

Իրավապաշտպանը հույս է հայտնել, որ այս նախաձեռնությունն ի վերջո արդյունք կտա: Հավելենք, որ ակցիայի մասնակիցները սրանով չեն բավարարվելու, կանցկացվեն նաեւ բողոքի այլ միջոցառումներ եւ բողոքի երթ:

Աղբյուրը՝ http://henaran.am/?p=33508

Լուսանկարները՝ Հելսինկյան Քաղաքացիական Ասամբլեայի Վանաձորի գրասենյակի