«Դա սպանություն էր»

Ս/թ հունիսի 15-ին Երեւանի մետրոյի «Գարեգին Նժդեհ հրապարակ» կայարանի մուտքի մոտ ոստիկանի արձակած կրակոցից սպանվել էր Արման Ենգիբարյանը: Տեղի ունեցածի վերաբերյալ ՀՔԾ-ում քննություն էր իրականացվում:
Արդյունքում ոստիկանի գործողությունները գնահատվեցին որպես իրավաչափ, եւ այդ մասով գործը կարճվեց: Այդ մասին երեկ զրուցեցինք Արման Ենգիբարյանի հոր` Սերգեյ Ենգիբարյանի շահերի ներկայացուցիչ, փաստաբան Էդմոն Մարուքյանի հետ:

- Ինչպե՞ս եք վերաբերվում գործի կարճման փաստին:

- Մեր գործողությունները հետեւյալն են լինելու: Մենք պետք է նախ դիմենք Հատուկ քննչական ծառայությանը, որպեսզի ստանանք կարճման որոշումը եւ բողոքարկենք այն, որովհետեւ մենք գտնում ենք, որ խախտվել է Արման Ենգիբարյանի կյանքի իրավունքը, գտնում ենք, որ ոստիկանների գործողությունները իրավաչափ չեն եղել, եւ, ըստ էության, դա սպանություն է եղել: Նրա ծնողների դիրքորոշումն էլ հետեւյալն է. Արման Ենգիբարյանը նշված ավազակային հարձակումների հետ ոչ մի առնչություն չունի: Բացի այդ, ոստիկանությունից ասում են, որ կանչ է եղել, որ մի մարդ փորձել է մի բնակարան մուտք գործել, դրա հիման վրա ոստիկանները հետապնդել են Ենգիբարյանին: Սկզբից նրա հետ որոշակի զրույց են ունեցել, քաշքշել են, հետո թույլ են տվել, որ նա հեռանա: Այսինքն, եթե ոստիկանները ուզում էին նրան վնասազերծել, նրան հենց այնտեղից պետք է բերման ենթարկեին: Բայց ոստիկանները թույլ են տվել, որ նա հեռանա իրենցից, հետո հետապնդել են, հետո էլ կրակել են ու սպանել: Այն, որ նա փորձել է ինչ-որ բնակարան մուտք գործել, դա դեռեւս հանցագործություն չէ: Հետեւաբար, հանցագործություն կատարած անձի հետապնդելու եւ նրան վնասազերծելու մասին խոսք լինել չի կարող:

- Այսինքն, խոսքը այն մասին է, որ Ենգիբարյանը հանցագործության վայրում կամ հանցագործության փորձի ժամանա՞կ չի վնասազերծվել:

- Այո: Փաստացի նա հանցագործություն կատարած չի եղել, իսկ նախկինում կատարվածների վերաբերյալ մինչ օրս ոչ մի ապացույց չկա: Առանձին քննություն է կատարվում այդ ավազակային հարձակումների վերաբերյալ: Եւ ես գիտեմ, թե ինչպիսին է լինելու այդ գործի ճակատագիրը: Այդ բոլոր գործերը միացնելու են մեկ վարույթում եւ կարճելու են, քանի որ կասկածյալը Արման Ենգիբարյանն է եւ նա մահացած է, իսկ քրեական դատավարության օրենսգրքի համաձայն, եթե կասկածյալը կամ մեղադրյալը քննության ընթացքում մահանում է, քրեական գործը կարճվում է: Իսկ մենք նախ սպանության գործը պետք է բողոքարկենք, որպեսզի քրեական գործի վարույթը վերականգնվի, եւ բոլոր մեղավորները պետք պատասխանատվության ենթարկվեն: Ինչ վերաբերվում է գործի մյուս մասին,  որը վերաբերվում է ավազակային հարձակումներին, պետք է Արման Ենգիբարյանի ներկայացուցիչներին հնարավորություն տրվի պաշտպանվելու: Մինչ օրս այդ հնարավորությունը մեզ չի տրվում, եւ մենք չենք կարողանում վիճարկել այն, որ ավազակային հարձակումը ինքն է արել:

- Իրավապահները ներկայացնում են, թե ավազակային հարձակումներից տուժածները ճանաչել են Ենգիբարյանին եւ ասել, որ հենց նա է հարձակումների հեղինակը: Ինչքանո՞վ են արժանահավատ այդ վկայությունները:

- Դեռեւս մինչեւ Արման Ենգիբարյանի սպանությունը այդ նույն վկաների միջոցով մի մարդ հայտնվել էր կալանքի տակ: Հենց այդ գործով, որ դատավոր Սամվել Մնացականյանի նկատմամբ կարգապահական վարույթ նշանակվեց, եւ նա ազատվեց դատավորի իր պաշտոնից: Իսկ այն անձը, որը եղել է կալանքի տակ, նրա նկատմամբ քրեական հետապնդումը դադարեցվել է: Այսինքն, նույն վկաները նախ ասել էին, որ իրենց վրա ավազակային հարձակում գործող անձը այդ մի մարդն է եղել, այնուհետեւ նույն բանը ասել են Ենգիբարյանի մասին: Այն ժամանակ այդ վկաները սխալվել էին եւ կարող են սխալվել նաեւ Արման Ենգիբարյանի առումով:

Աղբյուրը՝ http://www.armtimes.com/27155