Շարունակվում է քրեական գործ չհարուցելու որոշումը վերացնելու պահանջով գործի քննությունը

2011 թ. օգոստոսի 5-ին Լոռու մարզի ընդհանուր իրավասության դատարանում շարունակվեց իրավապահների կողմից վրացական պետհամարանիշներով մեքենաների երթն արգելելու վերաբերյալ քննիչի՝ քրեական գործ չհարուցելու որոշումը վերացնելու պահանջով Հելսինկյան Քաղաքացիական Ասամբլեայի Վանաձորի գրասենյակի բողոքի քննությունը:

Դատական նիստը նախագահում էր դատավոր Մ.ՄԵլքոնյանը, դիմող կողմից դատական նիստին մասնակցում էր ՀՔԱ Վանաձորի գրասենյակի նախագահ Ա.Սաքունցը, իսկ պատասխանող կողմից ներկա էր Լոռու մարզի դատախազության դատախազ Ա.Պողոսյանը: Լոռու մարզի քննչական բաժնի քննիչ Վ.Մարտիրոսյանը, չնայած նրան, որ ժամանակի եւ վայրի մասին պատշաճ կերպով ծանուցված էր, նիստին չէր ներկայացել: Նիստի ընթացքում դատախազը հայտնեց, որ քննիչը անձնական գործերով գտնվում է Երևանում:

Դատական նիստի ընթացում Ա.Սաքունցը ներկայացրեց իր պահանջը, այն է՝ վերացնել քննիչի կողմից քրեական գործ չհարուցելու մասին որոշումը, ինչպես նաև միջնորդեց որպես ապացույց գործին կցել Ժուռնալիստների «Ասպարեզ» ակումբ ՀԿ-ին ուղարկված «Հայաստանի ավտոմոբիլային ճանապարհների տնօրինություն» ՊՈԱԿ-ի գրությունը, որտեղ նշվում է, որ 2011 թ. փետրվարի 10-18-ն ընկած ժամանակահատվածում Շիրակի և Լոռու մարզերում ավտոճանապարհները փակ չեն եղել: Այս միջնորդության վերաբերյալ դատախազը հայտնեց իր առարկությունը:

Ա.Սաքունցը նաեւ միջնորդեց՝ դատարանի դահլիճում գործի վերաբերյալ ձայնագրություն եւ լուսանկարներ ներկայացնել: Դատարանը բավարարեց միջնորդությունը և դատական նիստը հետաձգվեց, որպեսզի քննիչը ևս ծանոթանա ներկայացվող նկարներին եւ ձայնագրությանը: