Հայաստանի ֆուտբոլի ֆեդերացիա թե՞ «Հայաստանի ֆուտբոլի ֆեդերացիա» ԻԱՄ

2011 թ. օգոստոսի 2-ին ՀՀ վարչական դատարանի Վանաձորի նստավայրում տեղի ունեցան ՀՔԱ Վանաձորի գրասենյակն ընդդեմ Վանաձորի համայնքի ավագանու թիվ 75 որոշումը առոչինչ ճանաչելու և թիվ 76 որոշումն ամբողջությամբ վերացնելու պահանջների մասին նախնական դատական նիստերը:

Դատական նիստերը վարում էր դատավոր Ա.Ալավերդյանը, նիստերին մասնակցում էին Հելսինկյան Քաղաքացիական Ասամբլեայի Վանաձորի գրասենյակի ներկայացուցիչ, փաստաբան Կ.Թումանյանը, Վանաձորի քաղաքապետարանի և համայնքի ավագանու ներկայացուցիչ Հ.Դավթյանը, որպես երրորդ անձ ներգրավված Հայաստանի ֆուտբոլի ֆեդերացիայի ներկայացուցիչ Լ.Բակումյանը:

Դատական նիստերի ընթացքում հայցվորի ներկայացուցիչ Կ.Թումանյանը դատարանին ներկայացրեց համայնքի ավագանու որոշումները, որտեղ նշված են՝ գույքը և հողամասը նվիրաբերել Հայաստանի ֆուտբոլի ֆեդերացիային, իսկ ի տարբերություն որոշման, պայմանագրերի մեջ նշված է գույքը և հողամասը նվիրաբերել «Հայաստանի ֆուտբոլի ֆեդերացիա» ԻԱՄ-ին /իրավաբանական անձանց միություն/: Կ.Թումանյանը միջնորդություն ներկայացրեց, որպեսզի Հայաստանի ֆուտբոլի ֆեդերացիան դատարանին ներկայացնի փաստաթղթեր, որով կսահմանվի Հայաստանի ֆուտբոլի ֆեդերացիայի կապը «Հայաստանի ֆուտբոլի ֆեդերացիա» ԻԱՄ-ի հետ:

Դատարանը բավարարեց միջնորդությունը, ըստ որի ֆեդերացիան մեկ շաբաթվա ընթացքում գրավոր պետք է ներկայացնի Հայաստանի ֆուտբոլի ֆեդերացիայի կանոնադրության և գրանցման վկայականի լուսապատճենները:
Դատարանն անցավ գործի դատաքննության փուլին և նիստը հետաձգեց անորոշ ժամանակով:

Հիշեցնենք, որ վերը նշված որոշումների համաձայն՝ Հայաստանի ֆուտբոլի ֆեդերացիային է նվիրաբերվում Վանաձորի մարզադաշտը և անհատույց հատկացվում շուրջ 44.000 քմ մակերեսով հողամաս: