Մարդու իրավունքների պաշտպանը սահմանափակվում է հարցում ուղարկելով

2011 թ. հուլիսի 16-ին ՀՀ Մարդու իրավունքների պաշտպանը դադարեցրել է փաստաբան Էդմոն Մարուքյանի կողմից ներկայացված բողոքի քննությունը ընդդեմ ՀՀ վերաքննիչ քրեական դատարանում անձանց մուտք ու ելքի նկատմամբ հսկողություն իրականացնող դատական կարգադրիչների գործողությունների:

Փաստաբան Էդմոն Մարուքյանը ՀՀ Մարդու իրավունքների պաշտպանին հասցեագրված դիմում նշել է, որ 2011 թ. ապրիլի 29-ին ՀՀ վերաքննիչ քրեական դատարանում նշանակված դատական նիստին ներկայանալիս դատարանի մասնաշենքի մոտ կարգադրիչների կողմից ստուգվել են իր և նույն նիստին մասնակցող քննիչի ինքնությունները, որից հետո կարգադրիչները պահանջել են ստուգել միայն իր պայուսակը: Փաստաբան Էդմոն Մարուքյանն այս հանգամանքը համարում է փաստաբանական մասնագիտության նվաստացում և խտրական վերաբերմունք կարգադրիչների կողմից:

Փաստաբանի կողմից բարձրացված խնդրին պարզաբանումներ տալու համար ՀՀ Մարդու իրավունքների պաշտպանը դիմել է ՀՀ դատական դեպարտամենտի դատական կարգադրիչների ծառայության պետին, ով պատասխան գրությամբ նշել է, որ քննիչի իրերը զննության չենթարկելը, իսկ փաստաբանի պայուսակը ստուգող սարքի միջով անցկացնելը նպատակ չի հետապնդել որևէ խտրական վերաբերմունքի դրսևորման: Որպես տարբերակման հիմք է հանդիսացել այն, որ քննիչի ձեռքին եղել է թափանցիկ թղթապանակ, որը և բացառել է զննման անհրաժեշտությունը:

Է. Մարուքյանը նշում է, որ ՀՀ դատական դեպարտամենտի դատական կարգադրիչների ծառայության պետն ակնհայտ սուտ է ասում, որն իրականությանը չի համապատասխանում: «Ավելին, իմ կողմից ներկայացված վարչական վարույթի շրջանակներում քննություն չի տարվել, ես չեմ ծանուցվել և չեմ մասնակցել վարչական վարույթի քննարկմանը, իմ կողմից մատնանշված անձը՝ ՀՔԱ Վանաձորի գրասենյակի նախագահ Ա.Սաքունցը, չի կանչվել հարցաքննության»,-ավելացնում է փաստաբանը: 

Է. Մարուքյանը նշում է, որ Մարդու իրավունքների պաշտպանը պետք է հիմնվեր այն հանգամանքի վրա, որ ՀՀ դատական դեպարտամենտի դատական կարգադրիչների ծառայության կողմից քննություն չի կատարվել և այն պնդումը, որ քննիչի ձեռքին թափանցիկ թղթապանակ է եղել, իրականությանը չի համապատասխանում:

Մարդու իրավունքների պաշտպանի կողմից դեպքի հանգամանքները պարզելու համար քայլեր չեն ձեռնարկվել, այլ հակառակը բողքի քննության դադարեցման համար հիմք է հանդիսացել  պետական մարմնի պատասխանը:

«Ես շահագրգռված եմ, որ Մարդու իրավունքների պաշտպանը՝ որպես մեխանիզմ աշխատի, բայց որ այսպես է քննելու, չեմ կարծում, որ սա արդեն իրավապաշտպան մեխանիզմ է: Օմբուդսմենը պետք է շատ ուշադիր լինի իր բողոքների քննության ժամանակ, հակառակ դեպքում իր՝ առանց այն էլ ցածր վարկանիշը ավելի կցածրանա»,-պնդում է Էդմոն Մարուքյանը:

Փաստաբանը պատրաստվում է դիմել ՀՀ վարչական դատարան՝ պատասխանատվության ենթարկելու  ՀՀ վերաքննիչ քրեական դատարանի տվյալ օրվա կարգադրիչներին իրենց ոչ իրավաչափ վարքագծի համար: