Ծրագիր՝ ուղղված պացիենտների իրավունքների պաշտպանությանը

2011 թվականից սկսած Հելսինկյան Քաղաքացիական Ասամբլեայի Վանաձորի գրասենյակը «Բաց հասարակության հիմնադրամներ»-ի ֆինանսական աջակցությամբ իրականացնում է ՀՔԱ Վանաձորի գրասենյակի կարողությունների զարգացման ծրագիր, որի մի մասն ուղղված է պացիենտների` մասնավորապես, թմրամիջոց օգտագործողների և հոգեկան խնդիրներ ունեցող անձանց իրավունքների պաշտպանությանը:

Ծրագրի շրջանակներում նախատեսվում է իրականացնել թմրամիջոց օգտագործող անձանց արդար դատաքննության իրավունքի մոնիթորինգ, որի համար կազմվել է հատուկ վերապատրաստում անցած մոնիթորների խումբ և դիտարկումներն արդեն իսկ իրականացվում են 2011 թվականի մայիս ամսից սկսած:

Այնուամենայնիվ, քրեական գործի կազմման առավել լիարժեք պատկեր ստանալու համար հարկ է դիտարկել նաև գործի նախաքննության փուլը: Հաշվի առնելով այն հանգամանքը, որ միայն կոնկրետ գործերով ներգրավվող փաստաբանները կարող են տալ նման տեղեկություններ` կազմակերպությունը հրավիրում է համագործակցության այն փաստաբաններին, ովքեր 2011 թվականի ընթացքում Լոռու, Տավուշի, Շիրակի մարզերում կամ Երևան քաղաքում նախաքննության փուլում ներգրավվել են իրականացնելու համար ՀՀ Քրեական օրենսգրքի 266, 267, 268, 269, 269.1, 270, 271, 272, 273, 274 հոդվածներով նախատեսված արարքների կատարման մեջ կասկածվող կամ մեղադրվող անձանց իրավական աջակցություն/պաշտպանություն:

Նախաքննության վերաբերյալ տեղեկությունների հավաքագրումն իրականացվելու է ըստ կազմակերպության կողմից մշակված քարտերի, որոնք լրացվելու են համապատասխան փաստաբանի կողմից այն գործերի կապակցությամբ, որոնց նախաքննությունն արդեն իսկ ավարտված է:

Համագործակցության ցանկություն ունեցող փաստաբաններին խնդրվում է արձագանքել 0322-42268 կամ 091 255898 հեռախոսահամարներով կամ tmatinyan@hcav.am էլեկտրոնային հասցեով Տաթևիկ Մատինյանին:

Կից ներկայացվում է փաստաբանի կողմից լրացվող քարտի օրինակը: