Մարդ սպանելն ավելի հեշտ ա

Ում եւ ինչի համար է տրվել 405 եղեւնու հատման թույլտվություն
 
Ինչպես ավելի վաղ տեղեկացրել ենք, Վանաձոր-Դիլիջան ավտոճանապահին` Անտառաշեն գյուղի հարևանությամբ մեծ քանակով եղևնիներ են հատվում, ու դատելով փակցված ցուցանակից, կարելի է եզրակացնել, որ դեռ էլի կհատվեն:
 
Երեկ մեր թղթակիցը բնակիչների ահազանգի հետքերով այցելել է դեպքի վայր: Հատման վայրում` ճանապարհի եզրին, եղևնիներից մեկի վրա փակցված է մեծ ցուցանակ, որի վրա գրված է. Անտառահատման տոմս թիվ 46. Սոճենի` 405 ծառ, շինափայտ`43,78, վառելափայտ`44,71: Տարածքում բանվորները Զիլ մակնիշի բեռնատարը հատված եղևնիներն էին բարձում, տարածքում մի քանի տղամարդ կային, ում մոտենալով ներկայացանք, պահանջեցինք հատման թույլտվություն, որոնք էլ մատնացույց արեցին ցուցանակը:
 
Հատված եղևնիները մեծաքանակ էին: Հատվել են հսկա, բարձր սոճիներ, որոնք ըստ տարածքում գտնվողների` օրինական ա, էս թվին մարդ սպանելուց ազատվելն ավելի հեշտ ա, քանց ծառ կտրելը, հետն էլ օրը ցերեկով, ճամփի բեռնին,- համոզում էին հավաքված մարդիկ:
 
Անտառահատողների կողքին էր նաև Գուգարքի տարածքի Մարգահովիտի անտառտնտեսության առաջին պահաբաժնի  անտառապահ Սամսոն Պողոսյանը, ով ևս վստահեցրել է, որ հատվող եղևնիները ամբողջությամբ օրինական են և կան համապատասխան բոլոր թույլտվությունները. Պետք է 405 հատ հատվի էս տարածքում: 43 կուբամետր շինափայտ, 44` վառելափայտ:
 
Անտառապահի խոսքով, թույլտվությունը տրվել է մեկ շաբաթ առաջ, իսկ թե ում համար է հատվում շինափայտը, անտառապահը կամ տեղյակ չէր, կամ էլ չցանկացավ ասել: Փոխարենը վստահեցրեց, որ ինքը առավոտից բանվորների կողքին է, որպեսզի սխալ ծառեր հանկարծ չհատվեն: Ինչպես հատված, այնպես էլ հատվելուն պատրաստվող եղևնիները համարակալված էին: Չնայած այդպես էլ չկարողացանք իմանալ, թե ում  պատվերով է նման քանակի եղևնի  հատվում, սակայն դատելով տարածքում կայանված Նիվա մակնիշի ավտոմեքենայի 03 ՍՕ  300 համարներից, կարելի է ենթադրել, որ պատվիրատուն լավ էլ մեջք ունի իր հետևում:
 
Սակայն զարմանալի է, որ սովորական ծառերը թողած, հիմա էլ սկսել են եղևնի վառել, երեևի սա էլ նոր պրիստիժ ա:

Աղբյուրը՝ http://lragir.am/armsrc/pubcorr50627.html