Դասընթաց «Երիտասարդների ներգրավումը Հարավային Կովկասի իրավապաշտպանական շարժման մեջ» ծրագրի շրջանակներում

2011 թ. հուլիսի 3-7-ը Վանաձոր քաղաքում ՀՔԱ Վանաձորի գրասենյակը «Երիտասարդների ներգրավումը Հարավային Կովկասի իրավապաշտպանական շարժման մեջ» ծրագրի շրջանակներում կազմակերպել էր հնգօրյա դասընթաց:
Դասընթացը «Մոնիթորինգի արդյունքների  ամփոփում և մարդու իրավունքների վերաբերյալ տարածաշրջանային այլընտրանքային զեկույցի պատրաստում» և «Շահերի պաշտպանության քարոզարշավ» թեմաներով էր:

Որպես դասընթացավարներ հանդես եկան Օլենա Վոլոչան («Դատական ադմինիստրացիա և մարդու իրավունքներ» ծրագրի փորձնակ /ITD, Massachusetts և «SeLeV Consulting Group» կազմակերպության զարգացման տնօրեն) և Օլենա Գռաբովսկայան («Դիալոգ» դասավանդողների խմբի դասավանդող):

Դասընթացի մասնակիցներն էին «Երիտասարդների ներգրավումը Հարավային Կովկասի իրավապաշտպանական շարժման մեջ» ծրագրի շրջանակներում ընդգրկված մոնիթորները Հայաստանից և Վրաստանից, ինչպես նաեւ կազմակերպության մի քանի անդամներ:

Հիշեցնենք, որ 2009 թվականի մարտի 1-ից ՀՔԱ Վանաձորի գրասենյակն իրականացնում է «Երիտասարդների ներգրավումը Հարավային Կովկասի իրավապաշտպանական շարժման մեջ» ծրագիրը, որը ֆինանսավորվում է The National Endowment for Democracy/NED ֆոնդի կողմից: Ծրագրի նպատակն է`բարձրացնել երիտասարդների դերը իրավապաշտպանական շարժման մեջ:

Ծրագրի առաջին տարում մասնակիցների հմտությունները զարգացնելու նպատակով կազմակերպվեց «Մարդու իրավունքների մոնիթորինգ ոստիկանություն- քաղաքացի հարաբերություններում» թեմայով: Դասընթացի արդյունքում մասնակիցները ձեռք բերեցին անհրաժեշտ գիտելիքներ և հմտություններ մարդու իրավունքների մոնիթորինգի վերաբերյալ և իրականացրեցին չորսամսյա մոնիթորինգ /2010 թ. հոկտեմբեր  – 2011 թ. հունվար / Հայաստանում, Վրաստանում և Հարավային Օսեթիայում:

«Մոնիթորինգի արդյունքների ամփոփում և մարդու իրավունքների վերաբերյալ տարածաշրջանային այլընտրանքային զեկույցի պատրաստում» և «Շահերի պաշտպանության քարոզարշավ» թեմաներով դասընթացն իրականացված մոնիթորինգի տրամաբանական շարունակությունն էր: Դասընթացն ուղղված էր մոնիթորինգի շրջանակներում ձեռքբերված տեղեկատվության վերլուծության, զեկույցի պատրաստման, շահերի պաշտպանության հմտությունների զարգացմանը:

Դասընթացի ավարտից հետո մասնակիցները ներգրավվեցին Հայաստանում և Վրաստանում ոստիկանություն-քաղաքացի հարաբերություններում մարդու իրավունքների վերաբերյալ այլընտրանքային զեկույցի պատրաստման գործընթացում: Զեկույցը նախատեսվում է տպագրել սույն թվականի նոյեմբերին անգլերեն և ռուսերեն լեզուներով: Երիտասարդ ակտիվիստների աշխատանքը կվերահսկվի և կուղղորդվի դասընթացավարների կողմից: