Վանաձորում անօթեւաններին վտարում են տնակներից, իսկ նրանք պնդում են, որ գնալու տեղ չունեն

Վանաձորի թիվ 1 տնակային ավանում  տնակատերերի զբաղեցրած տարածքն օտարվել է եւ անօթեւան 40 վանաձորցի ընտանիքներին սպառնում է վտարման վտանգ: Շատերի գործերը դատարանում են:

Հելսինկյան Քաղաքացիական Ասամբլեայի Վանաձորի գրասենյակի իրավաբան Հայկուհի Հարությունյանի գնահատմամբ, կատարվել է ապօրինություն: «Քաղաքապետն ու ավագանին գերազանցել են իրենց լիազորությունները, վաճառել են տարածքներ, որոնք ժամանակին վարձակալությամբ տրվել են տնակատերերին»,- ասել է նա:

Տեղանքում բնակվող վանաձորցիների խոսքով՝ տարածքն իրար մեջ են բաժանել քաղաքի մեծահարուստները: «Շուրջ 50-60 ընտանիք է ապրում այդտեղ, մի մասն ունի անօթեւանի կարգավիճակ, մի մասը` ոչ: Բոլորին էլ այսօր վտարման վտանգ է սպառնում: Թե ուր պետք է գնան այդ ընտանիքները, մատնացույց չեն անում, միայն ասում են, որ սեղմ ժամկետներում տարածքն ազատել է պետք, որովհետեւ սեփականատերեր կան»,- NEWS.am-ի թղթակցի հետ զրույցում ասել են բնակիչները:

«Հիշյալ վճռով արդեն բավականաչափ ընտանիքներ վտարվել են, մնում են շուրջ 60-ը, որոնք սակայն գնալու տեղ չունենալով պայքարում են սեփական իրավունքների համար: Ինձ օրինակ արդեն մի քանի անգամ փորձել են տեղահանել, բայց չեն կարողացել: Այստեղ անգամ հաշմանդամ են ծեծել, բարուր շպրտել ու կանանց հրմշտել»,-ասել է բնակիչներից Եղիսաբեկ Կիրակոսյանը:

Նրա խոսքով, տարածքը վաճառվել է աճուրդով, որից բնակիչները տեղյակ չեն եղել: Նրանցից ոմանք ավելի վաղ դիմած են եղել Վանաձորի  քաղաքապետարան՝ առաջարկելով իրենց վաճառել տնակների զբաղեցրած տարածքը, սակայն մերժում են ստացել: Ավելի ուշ իմացել են, որ սեփական տնակի տարածքը վաճառված է, իսկ գնորդները բնակիչների խոսքով, քաղաքապետ Սամվել Դարբինյանի մտերիմներն են:

Տնակային ավանում քչերն են հավատում խոստմանը, որ 1-2 տարի հետո կապրեն նորմալ բնակարանում: Նրանք նշել են, որ դեռեւս 2009-ին էին իրենց խոստացել, որ մինչեւ 2012 թվականը Վանաձորում կլուծվի անօթեւանության խնդիրը: Հիմա էլ վերջնաժամկետը 2013  թվականն է:

Աղբյուրը՝ http://news.am/arm/news/56727.html