Ընտրություններին լայնորեն ներգրավված են քրեական խմբավորումները

Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը, «Գործընկերություն հանուն բաց հասարակության» նախաձեռնության կազմակերպած ԸՕ փոփոխությունների վերաբերյալ քննարկումների ընթացքում, ամփոփելով անցած ընտրությունների փորձը, նշեց խախտումների իրականացման հիմնական եղանակները:

Սաքունցի խոսքերով, ընտրախախտումները հիմնականում իրականացվում են վարչական ռեսուրսների օգտագործմամբ, այդ թվում` ոստիկանության և զինված ուժերի օգտագործում. «Վերջին ընտրությունների ժամանակ ներգրավված էին նաև քրեական խմբավորումները` որպես վարչական ռեսուրսների կարևորագույն գործոններ»:

Ընտրախախտումների երկրորդ խումբն, ըստ Սաքունցի, ահաբեկումներն են ընտրողների և թեկնածուների նկատմամբ, որի մեջ մտնում են զանազան ճնշումները, ինչպես նաև կաշառելը:

Երրորդ խումբը` խոսքի և կարծիքի արտահայտման ազատության խախտումներն են. «Դա ոչ միայն թեկնածուների կարծիքները կամ ծրագրերը ընտրողներին հասցնելուն խոչընդոտելն է, այլ նաև հենց ԶԼՄ-ի նկատմամբ ճնշումներն ու լրագրողների նկատմամբ բռնություններն ու ահաբեկումները»,- ընդգծեց Սաքունցը:

Նրա խոսքերով, լայնածավալ օգտագործվում են նաև խմբային կազմակերպված կրկնակի քվեարկությունները, ինչպես նաև բացակա և մահացած ընտրողների մասնակցությունը:

Սաքունցի գնահատմամբ, խախտումները արձանագրվում են, բայց բողոքարկման արդյունավետ մեխանիզմ չկա, իսկ Սահմանադրական դատարանը 2003թ. նախագահական ընտրություններից հետո կայացրած որոշմամբ արդեն իսկ ցույց է տվել, թե ինչպիսին է դատական իշխանության դերը ՀՀ-ում:

Աղբյուրը՝ http://1in.am/arm/armenia_society_15918.html