Նախաքննությունը անցել է թերություններով

2011 թ. մարտի 10-ին,  ՀՀ Կոտայքի մարզի ընդհանուր իրավասության դատարանի Հրազդանի նստավայրում տեղի ունեցավ դպրոցում վիճաբանության արդյունքում մահացած Դերենիկ Գասպարյանի քրեական գործի վարույթը կարճելու մասին գործի դատաքննությունը:

Դատական նիստին մասնակցում էին տուժողի իրավահաջորդ Դ.Մկրտչյանը, իրավահաջորդի ներկայացուցիչ  Ա.Զալյանը, Կոտայքի մարզի դատախազության ավագ դատախազ Ա.Վարդանյանը, Չարենցավանի քննչական բաժանմունքի քննիչ Հ.Մկրտչյանը:

Նիստի ընթացքում տուժողի իրավահաջորդ Ա.Զալյանի կողմից ներկայացվց են 12 կետից բաղկացած թերությունների շարք, որոնք չեն բացահայտվել նախաքննության ընթացքում:

Մասնավորապես՝ նախաքննության ընթացքում չի բացահայտվել՝  
  
•    Դ.Գասպարյանի դասղեկի դասասենյակից բացակայելու ժամանակը, գտնվելու վայրը
•    Դ.Գասպարյանին ծեծի ենթարկելու ժամը, ծեծի ենթարկելուց հետո դպրոցի հավաքարարների վրա հասնելու ժամանակը, ծեծի ենթարկելու և հիվանդանոց տեղափոխելու ժամանակահատվածը
•    դպրոցում բուժկետի առկայության եւ միջադեպի պահին բուժկետի համապատասխան աշխատակցի գտնվելու վայրը, եւ եթե տվյալ պահին Դ.Գասպարյանին համապատասխան բուժօգնություն տրամադրվեր, հնարավո՞ր էր արդյոք փրկել կյանքը: 

Ա.Զալյանը, թվարկելով խախտումները, հավելել է նաեւ, որ իրականացված նախաքննությամբ  և փորձագետի եզրակացությամբ չեն պարզաբանվել հետևյալ հարցերը.

     1. ի՞նչ պատճառով կարող էին առաջանալ Դ.Գասպարյանի ներքին օրգանների փոփոխությունները
     2. նեքին օրգանների փոփոխությունների առաջացումից որքա՞ն ժամանակ անց է վրա հասել մահը
     3. մինչև մահը ներքին օրգանների փոփոխություններից հետո որքա՞ն ժամանակ է Դերենիկ Գասպարյանը կենդանի մնացել
     4. ի՞նչ միջամտության դեպքում հնարավոր կլիներ փրկել նրա կյանքը
     5. կենդանության օրոք նրա մոտ առկա հիվանդությունների ի՞նչ տեսակ
զարգացումներ են եղել և որքա՞ն ժամկետներում կարող էին մահվան պատճառ հանդիսանալ:

Գործով վերահսկողություն իրականացնող դատախազը եւ նախաքննություն իրականացնող քննիչը ի պատասխան ներկայացուցչի կողմից ներկայացված հարցերին նշեցին, որ նախաքննությունը կատարվել է պատշաճ, ներկայացուցչի կողմից ներկայացրած դիմում-բողոքները դարձել են քննության առարկա, իսկ ներկայացված հիմնավորումներն անհիմն են:

Դատական նիստից հետո դատավորը հեռացավ խորհրդակցական սենյակ՝ որոշում կայացնելու: Որոշումը կհրապարակվի 2011 թ. մարտի 18-ին՝ ժամը 14:00-ին: