«Մենք մեղավոր չենք, տրակտորն իր գործն է անում»,- արդարանում էին ոստիկանության աշխատակիցները

Այսօր՝ 2011 թվականի փետրվարի 15-ին, ժամը 4:30-ի սահմաններում, Շիրակի մարզի Ջաջուռ գյուղի մոտակայքում ոստիկանության կողմից փակված ճանապարհի հետեւանքով առաջացած ավտոշարասյունը շարժվել է դեպի Վանաձոր քաղաք, այն բանից հետո, երբ Ախուրյանի ոստիկանության աշխատակիցները հանկարծակի լքել են վերահսկվող ճանապարհահատվածը:

Մինչ այդ Վանաձոր քաղաքում հավաքված վարորդները «Ժառանգություն» կուսակցության ներկայացուցիչ Ազգային ժողովի պատգամավորներ Զարուհի Փոստանջյանի, Ստեփան Սաֆարյանի, կուսակցության նախագահ Արմեն Մարտիրոսյանի եւ կուսակցության Վանաձորի ներկայացուցիչ Գառնիկ Սահակյանի մասնակցությամբ հանրահավաք են կայացրել: Հանրահավաքից հետո մասնակիցները ավտոմեքենաներով շարժվել են Ջաջուռից եկող ավտոշարասյանն ընդառաջ:

Շիրակի մարզի Մեծ Պարնի գյուղի մոտ Վանաձորից գնացող եւ դեպի Վանաձոր եկող գյումրեցի վարորդների ավտոմեքենաները հանդիպել են իրար, միավորվել եւ մեկ շարասյունով շարժվել դեպի Վանաձոր:

Վանաձոր քաղաքից մոտ 500 մետր հեռավորության վրա՝ չհասած Վանաձոր-Ստեփանավան խաչմերուկի մոտ, ավտոմեքենաներին սպասում էր ճանապարհային ոստիկանության ավելի քան չորս մեքենա, ոստիկանական համազգեստով մոտ 20 մարդ, ինչպես նաեւ քաղաքացիական հագուստներով ոստիկաններ: Մինչեւ մեքենաների շարասյունը կհասներ Վանաձոր ճանապարհի հենց այս հատվածում՝ ոստիկանների մոտ, կայանեց նաեւ ճանապարհի ձյունը մաքրող տրակտոր: Ճանապարհային ոստիկանության մեքենան եւ դրան զուգահեռ ճանապարհի կենտրոնում կանգնած տրակտորը փակեցին ողջ ճանապարհը եւ այն դարձավ անանցանելի թե՛ շարասյան մեքենաների, թե՛ Վանաձորից դուրս եկող կամ դեպի Վանաձոր եկող մեքենաների համար: Մոտ 30 րոպեի ընթացքում Վանաձոր-Սպիտակ ճանապարհի երկարությամբ գրեթե 1 կմ հատվածում առաջացավ ավելի քան 80 մեքենաների խցան, որոնց թվում էին երթուղային տաքսիներ, բեռնատարներ, զինվորական մեկ մեքենա:

Այս հանգամանքն առաջացրեց ուղեւորների դժգոհությունը, որոնք ստիպված դուրս եկան մեքենաներից, փորձեցին ճանապարհի այդ հատվածը շրջանցել ոտքով: Կարճ ժամանակում ճանապարհի այդ հատվածը ողողվեց դժգոհ ուղեւորներով, երթի մասնակից վարորդներով, որոնց միացան նաեւ Լոռու մարզային ոստիկանության վարչության պետը, Վանաձորի ոստիկանության պետը, Ճանապարհային ոստիկանության Լոռու մարզի պետը: Վերջիներս բողոքում էին, թե երթի մասնակիցներն անտեղի իրարանցում են սարքել, եւ խոչընդոտում են մեքենաների եւրթեւեկությանը: Նրանց պաշտոնական պարզաբանմամբ՝ տրակտորի հետ իրենք որեւէ առնչություն չունեն, տրակտորն «իր աշխատանքն է իրականացնում»՝ ձյունից մաքրում է ճանապարհը /ի դեպ տրակտորն ամբողջ ժամանակահատվածում կանգնած էր նույն տեղում/:

Մոտ 30 րոպե անց պատգամավորների հետ բանակցություններից հետո «ոստիկանապետերի» հրահանգով տրակտորը շարժվեց տեղից՝ բացելով ճանապարհը: Ճանապարհային ոստիկանության «կարգավորումների եւ ուղղորդումների» արդյունքում մոտ 20 րոպե անց նոր միայն ճանապարհը դարձավ անցանելի:

Ավելի մանրամասն տեղեկությունները Հելսինկյան Քաղաքացիական Ասամբլեայի Վանաձորի գրասենյակը կհրապարակի վաղը՝ 2011 թվականի փետրվարի 16-ին: