Իշխանությունները կրկին մերժել են հեռարձակել՝ չնայած դատարանի որոշման առկայությանը

/Նյու Յորք/ - «Հայաստանը մերժել է «Ա1+» անկախ հեռուստաընկերությանը եթեր տրամադրել՝ անկախ այն հանգամանքից, որ Մարդու իրավունքների եվրոպական դատարանը որոշում էր կայացրել, որ նախկին մերժումները խախտել են ազատ արտահայտման իրավունքը»- այսօր հայտարարել է Human Rights Watch կազմակերպությունը:

«Այսօրվա որոշումը մեկ այլ հետընթաց է Հայաստանում ազատ արտահայտման եւ տեղեկատվության ազատության բնագավառում»,-ասել է Human Rights Watch-ի Հարավային Կովկասի հետազոտող  Գիորգի Գոգիան: «Պարզ է, որ քննադատությունը եթերից հեռու պահելը ավելի կարեւոր է այս կառավարության համար, քան իր միջազգային իրավական պարտականությունները»:

«Ա1+»-ը, որը հայտնի է որպես կառավարության քաղաքականությունը քննադատող անկախ հեռուստաընկերություն, եթերազրկվել է 2002 թ-ին, երբ իր արտոնագիրը չեղյալ համարվեց, սակայն շարունակեց գործարկել նորությունների հայտնի կայքը եւ օն-լայն հեռուստակայանը: Այդ ժամանակվանից ի վեր այն 12 անհաջող փորձ է կատարել հեռարձակման նոր արտոնագիր ձեռք բերելու համար:

2010 թ-ի դեկտեմբերի 16-ին Հեռուստատեսության եւ ռադիոյի ազգային հանձնաժողովը /ՀՌԱՀ/, որը հանդիսանում է Հայաստանում հեռարձակման արտոնագիր տրամադրող մարմին, 13-րդ անգամ մերժեց «Ա1+»-ին: Հանձնաժողովի կազմում ընդգրկված են նախագահի կողմից նշանակված անձինք:

2008 թ-ին Մարդու իրավունքների եվրոպական դատարանը հրապարակեց որոշում այն մասին, որ Հայաստանը խախտել է Մարդու իրավունքների եվրոպական կոնվենցիան՝ անընդհատ մերժելով հեռուստակայանի հեռարձակման դիմումները: Դատարանը գտել է, որ հեռարձակման արտոնագրերի տրամադրման հարցը կարգավորող օրենքները չեն պաշտպանում արտոնագիր տրամադրող մարմնի քմահաճ որոշումներից, եւ որ «Ա1+»-ին արտոնագիր տրամադրելու մերժումը անօրինական էր:

Հանձնաժողովի դեկտեմբերի 16-ի հանդիպումը առաջինն էր 2008 թ-ին նոր արտոնագրերի հետաձգման մասին հայտարարությունից հետո: Եվրոպական դատարանի որոշումից անմիջապես հետո Հայաստանի իշխանությունները հետաձգեցին արտոնագրերի տրամադրումը, մինչեւ որ հեռուստատեսությունն ու ռադիոն անալոգային համակարգից կանցնեին թվայինի, որը նախատեսված էր 2010 թ-ին: Արտոնագրերի տրամադրման հետաձգումը շատ տեղական  եւ միջազգային դիտորդների կողմից դիտարկվեց որպես կառավարության հետագա ջանքեր՝ եթերից հեռացնելու «Ա1+»-ին:

Ակնկալելով թվային հեռարձակման անցնելուն՝ հունիսին կառավարությունը հապճեպորեն ընդունեց «Հեռուստատեսության եւ ռադիոյի մասին» նոր օրենք, որը լիովին չի լուծում քաղաքացիական հասարակության եւ Հայաստանի միջազգային գործընկերների կողմից արտահայտված մտահոգությունները:

ՀՀ նախագահին ուղղված հունիսի նամակում  Human Rights Watch-ը մտահոգություն էր հայտնել, որ նոր օրենքը կնվազեցնի լրատվամիջոցների թիվը, ինչպես նաեւ տարբեր տեղեկությունների եւ կարծիքի հանրային մատչելիությունը: Լրատվամիջոցների նոր օրենքը նվազեցրեց հեռուստաընկերությունների թիվը՝ հասցնելով այն 22-ից 18-ի եւ չկարողացավ լուծել այն մտահոգությունները, որ օրենքը չի ապահովում բազմակարծություն արտոնագրի տրամադրումը կարգավորող մարմնի անդամների ընտրության եւ նշանակման հարցում: 

«Ենթադրվում էր, որ թվային հեռարձակման անցումը պետք է հնարավորություններ ընձեռեր Հայաստանում լրատվամիջոցների բազմազանության համար», -ասել է Գոգիան: «Կառավարությունը երկար ճանապարհ ունի անցնելու, որպեսզի ապացուցի, որ իր արարքները համապատասխանում են իր պարտավորություններին»: 

Դեկտեմբերի 16, 2010

http://www.hrw.org/