Հերթական նվիրատվությունը Վանաձոր համայնքի բյուջեի հաշվին

2010 թ. հոկտեմբերի 26-ին Վանաձորի ավագանու նիստում հերթական անգամ գույքի անվարձահատույց տրամադրման մասին որոշում կայացվեց: Որոշմանը կողմ քվեարկեցին 9 ավագանու անդամ, դեմ` 3, ձեռնպահ` 2:

Որոշման համաձայն` Վանաձորի ֆուտբոլի մարզադաշտը և Տարոն 4 թաղամասում մոտ 44.000 քմ մակերես ունեցող տարածքներն անվարձահատույց հանձնվեցին Հայաստանի Հանրապետության ֆուտբոլի ֆեդերացիային:

Որպես որոշման հիմնավորում` Վանաձոր համանքի ղեկավարի և ավագանու  կողմից ներկայացվեց Հայաստանի Հանրապետության ֆուտբոլի ֆեդերացիայի կողմից մարզադաշտի վերանորոգման, վերակառուցման և Տարոն 4 թաղամասում ֆուտբոլի մարզադաշտեր կառուցելու համար ֆինանսական ներդրումների փաստը:

Ավագանու անդամները և Վանաձորի քաղաքապետը հաշվի չառան այն հանգամանքը, որ Հայաստանի Հանրապետության ֆուտբոլի ֆեդերացիան ներդրում է իրականացնում ՈւԵՖԱ-ի կողմից տրամադրված միջոցների հաշվին: Նշված միջոցները, ՈՒԵՖԱ-ի սկզբունքների համաձայն, տրամադրված են ոչ թե անհատական կամ խմբային շահերի, այլ համայնքի մակարդակում ֆուտբոլի զարգացման համար: Մինչդեռ, տվյալ պարագայում մասնավորեցումն իրականացվում է ֆուտբոլի ֆեդերացիայի միջոցների հաշվին, որն իր առջև ուրիշ խնդիրներ է դրել:

Փաստացի, մարզադաշտը և համայնքի հողատարածքը սեփականության իրավունքով Հայաստանի Հանրապետության ֆուտբոլի ֆեդերացիային հատկացնելու փաստը ևս հակասում է ՈւԵՖԱ-ի սկզբունքներին:

Հերթական անգամ համայնքի ավագանին կայացնում է որոշում, որով համայնքի գույքի անվարձահատույց տրամադրումը զրկում է համայնքի բյուջեն լրացուցիչ դրամական միջոցներով համալրելուց և համայնքային մակարդակում սպորտի զարգացման երաշխիքներից:

Հիշեցնենք, որ 2009 թվականի հունիսի 25-ին ՀՔԱ Վանաձորի գրասենյակը հայցադիմում է ներկայացրել ՀՀ վարչական դատարանի Վանաձորի նստավայր ընդդեմ Վանաձորի քաղաքապետի և Վանաձոր համայնքի ավագանու՝ Վանաձոր համայնքի ավագանու կողմից 2009 թվականի ապրիլի 23-ին ընդունված թիվ 29 որոշումը (Վանաձորի ավագանու գույքի անվարձահատույց ՀՀ էլեկտրական ցանցերի Դեբեդ մասնաճյուղին տրամադրման մասին որոշում) առոչինչ ճանաչելու պահանջով: Վարչական դատարանը մերժել է բողոքը ընդունել, պատճառաբանելով, որ կազմակերպությունը, ՀՀ վարչական դատավարության օրենսգրքի համաձայն, իրավունք չունի բողոքարկել հանրային շահին վերաբերող որոշումները: ՀՀ վարչական դատավարության օրենսգրքի այս հոդվածի սահմանադրականությունը կազմակերպությունը վիճարկել է ՀՀ սահմանադրական դատարանում: Իր որոշման մեջ սահմանադրական դատարանը գտել է, որ հասարակական կազմակերպությունները պետք է ունենան հանրային շահի  դատական պաշտպանության իրավունք:

Օգտվելով այս հնարավորությունից` ՀՔԱ Վանաձորի գրասենյակը նախաձեռնելու է դատական գործընթաց` նպատակ ունենալով այս որոշումը ևս դատական կարգով ճանաչել անվավեր: