Քննիչի մահը պատահական չէ՞ր

Երեւանի քննչական վարչության քննիչ Տիգրան Սահակյանի մահը իրավապաշտպան Արթուր Սաքունցը պատահական չի համարում: Ավագ լեյտենանտը, ով պաշտոնական վարկածով` զոհվել է ավտովթարից, երեկ կեսգիշերին Պաշտպանության նախարարության շենքի մոտ, մարտի 1-ի քրեական գործով քննիչ է:
«ՀՀ-ում, ցավոք սրտի, ամեն ինչ ունի քաղաքական ենթատեքստ, այդ թվում` նաեւ հոկտեմբերի 27-ի հետ կապված ցմահ դատապարտվածների տարօրինակ մահերը: Պատահական ոչինչ չի լինում»,- այսօր հայտարարեց Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը:

Ըստ իրավապաշտպանի` նրանց նկատմամբ է իրականացվում մահափորձ, ովքեր շատ լավ տիրապետում են որոշակի ինֆորմացիայի եւ լուրջ վտանգ կա, որ այդ ինֆորմացիան կարող է սպրդել:

«Ի՞նչ է Մհերյանինն էլ է պատահական, Վռամ Գալստյանի՞նն էլ: Մեկը հոսանքահարումից է մահանում, մեկը` ավտովթարից, մեկին էլ սպանում են օրը ցերեկով»,- ընդգծեց նա:

Իրավապաշտպանը անդրադարձավ նաեւ Ադրբեջանի կողմից գերևարված Մանվել Սարիբեկյանի ինքնասպանության փաստին եւ ՀՀ Պաշտպանության նախարարության արձագանքին:

Հայտարարելով, որ երիտասարդի մահվան պատասխանատվությունը ընկնում է Ադրբեջանի վրա` ՊՆ-ը ընդգծել էր. «Արդեն որերորդ անգամ Ադրբեջանը հանցավոր քայլերի է գնում՝ չարժանանալով միջազգային իրավասու կառույցների պարսավանքին: Հենց այդ անպատժելիության զգացողությունն է սպանել միջազգային նորմերով չպաշտպանված մեր հայրենակցին»:

«Սա հենց այն գնահատականն է, որ պետք է տրվի նաեւ ՀՀ իշխանություններին: Նրանք, պատասխանատվության չենթարկելով մարտի 1-ի` հստակ հանցագործություն կատարողներին, նպաստում են անպատժելիության մթնոլորտի ձեւավորմանը, սեփական քաղաքացիների նկատմամբ էլ կիրառվում են բռնություններ»,- ասաց Արթուր Սաքունցը:

Նրա կարծիքով` Հայաստանը հետընթաց է ապրել` ԵԽԽՎ-ի կողմից չարժանանալով համարժեք գնահատականի` պարտավորությունների չկատարման առումով: Իսկ այդ պահանջները, ըստ Արթուր Սաքունցի, ինչքան գնացել, այնքան մեղմացել են:

Աղբյուրը` http://www.a1plus.am/am/social/2010/10/6/arthur-squnc