Զինծառայողները կդիմեն դատարան

Պաշտպանության նախարարությունն ԱԺ է ուղարկել «ՀՀ զինված ուժերի կարգապահական կանոնագրքի» նախագիծ, որի շուրջ երեկ ԱԺ-ում գլխադասային` պաշտպանության հանձնաժողովը կազմակերպել էր լսումներ:

Այս օրենքի նախագծով առաջին անգամ օրենսդրորեն պետք է կարգավորվեն զինծառայողների եւ հրամանատարական կազմի իրավասությունները, իրավունքները, իրավախախտումների եւ դրանց համար սահմանված  տույժերի կիրառման կարգը. մինչ կանոնագրքի ուժի մեջ մտնելը այս իրավահարաբերությունները բանակում կարգավորվել եւ կարգավորվում են կառավարության 1996 թվականի 247 որոշմամբ: Ինչ վերաբերում է մյուս իրավահարաբերություններին, ապա դրանք սահմանվում եւ կարգավորվում են բանակին առնչվող այլ օրենքներով: Օրենքի դրույթներից մեկով ամրագրվում է, որ ՀՀ Սահմանադրությանն ու օրենսդրությանը ակնհայտ հակասող հրամանների կատարումից զինծառայողը կարող է խուսափել` այդ մասին համապատասխան զեկուցագիր ներկայացնելով իրեն անմիջական հրաման տվողից ավելի վերադաս հրամանատարին: Իսկ որ հրամանը ակնհայտ ապօրինի է, զինծառայողը, ըստ օրինագիծը մշակողների, պետք է իմանա «ներքին համոզմունքի կամ իր գիտելիքի  հաշվին»:

Բնականաբար, զինծառայողն իրավունք չունի վիճարկել հրամանը, այսինքն` զեկուցագիր ներկայացնել, եթե մարտական հերթապահության մեջ է: Հաջորդ նորամուծությունն այն է, որ զինծառայողը կարող է դատական ատյաններում վիճարկել վերադաս հրամանատարության սահմանած տույժերն ու պատիժները: Աբսուրդ է պատկերացնել, որ զինծառայողին ժամանակ եւ հնարավորություն կտրվի լքել զորամասը, փաստաթղթեր հավաքել ու դիմել դատարան` ընդդեմ հրամանատարակազմի: Օրենքի նախագծով մտնում է նոր հասկացություն` «կարգապահական վաշտ», որով իբր վերացվում է կարգապահական կալանքը` «գաուբվախտը»՝ որպես այդպիսին, իսկ այն փոխարինվում է  կարգապահական վաշտում անցկացվող խստացված ծառայությամբ: Նկատենք, որ աշխարհագրորեն դրանք պետք է գտնվեն ռազմական ոստիկանության տարածքում, իսկ սա, իրավապաշտպան Արթուր Սաքունցի գնահատմամբ, նշանակում է, որ դե յուրե կալանքը կփոխարինվի փաստացի կալանքով:

Վերջնական քննարկումը կկազմակերպվի վաղը` սեպտեմբերի 9-ին, Վենետիկի հանձնաժողովի եւ ԵԱՀԿ փորձաքննությունից առաջ:

Աղբյուրը՝ http://www.hraparak.am/2010/09/08/zincarayoxnere-kdimen-dataran/