Նամակ խմբագրությանը

«Ժամանակ» օրաթերթի 25.08.2010թ. համարում «Արմեն Աշրաֆյանը «մխտռո՞ւմ է» կոռուպցիայի դեմ պայքարը» հոդվածին ի պատասխան տեղեկացնում եմ, որ վերոհիշյալ պաշտոնյան իսկապես ծնունդով Լեռնապատ գյուղից է, սակայն հոդվածում ներկայացվող Կամո, Սամվել, Գյուլվարդ, Նարինե, Արմեն, Արամայիս, Միշա Աշրաֆյանները պաշտոնյայի բարեկամները չեն:

Լեռնապատ համայնքում կան մի քանի ազգություններ (Աբազյան, Հակոբջանյան, Բաբայան, Աշրաֆյան եւ այլն): Աշրաֆյանները համայնքի բնակչության շուրջ երեսուն տոկոսն են կազմում ու եթե կրում են այդ ազգանունը, դեռ չի նշանակում, թե վերոհիշյալ պաշտոնյայի բարեկամն են: Մյուս կողմից` օգնություն տրամադրում է ոչ թե գյուղապետը, այլ այդ իրավունքը ՏԻՄ օրենքի 16 հոդվածի 20 կետով վերապահված է ավագանուն: Լեռնապատ գյուղում բոլոր օգնությունները տրամադրվել են ավագանու որոշումներին համապատասխան, որոնք ենթակա են պարտադիր կատարման համայնքի ղեկավարի կողմից, իսկ որոշումների օրինականությունը մշտապես ստուգվում է մարզպետարանի կողմից:

Հոդվածում իբրեւ փաստ ներկայացվում է, որ մահացած մարդիկ օգնություն են ստացել, որը բացահայտ զրպարտանք է: Մեռած մարդը չէր կարող դիմում գրել գյուղապետին, իսկ ավագանին էլ մեռած մարդուն օգնություն չէր տրամադրի: Լրագրողին կեղծ տեղեկություն տվող այդ մարդիկ արդեն տասնյակ բողոք-զրպարտագրեր են հղել տարբեր ատյաններ, որի հետեւանքով գյուղապետարանում կատարվել են ստուգումներ Լոռու մարզպետարանի, ՀՀ ֆինանսների նախարարության ներքին աուդիտի եւ վերահսկողության վարչության, ՀՀ սոցապ նախարարության կողմից. կազմված են ակտեր, որոնցում խախտումներ չեն արձանագրվել:

Լ.Ղումաշյանին տրված տեղեկանքը օրինական է, ուստի պետությանը վնաս չի պատճառվել. այդ մասին կա նաեւ մասնագիտական եզրակացություն (այդ մասին տեղեկությունը տարածել էր ՀՀ գլխավոր դատախազության լրատվական ծառայությունը.- Է.Մ.):

Ինչ վերաբերում է Ա.Սաքունցի տարածած զրպարտությանը, թե գյուղապետը յուրացրել է 11 միլիոն դրամ, այդ բողոքի հիման վրա հարուցվել է քրեական գործ, եւ շուրջ վեց ամիս է` քննության են ենթարկվում համայնքի բնակիչները, որոնց ստացած օգնությունները Սաքունցը միտումնավոր ներկայացնում է որպես յուրացում: Հարյուրավոր մարդիկ` տարբեր ազգություններից օգնություն են ստացել, մինչդեռ հոդվածից տպավորվում ես, թե օգնություն են ստացել միայն Եղիազարյան եւ Աշրաֆյան ազգանունը կրողները: Սաքունցի շահագրգռությունը բացահայտվում է նաեւ այն փաստով, որ նա հրապարակայնորեն ցուցումներ է տալիս նախաքննական մարմնին` դադարեցնելու համայնքի ղեկավարի լիազորությունները:

Այնպես որ, Լեռնապատ համայնքի մի քանի անգրագետ ու բանսարկու բնակիչների զրպարտանքներով սնվող Սաքունցը փորձում է ազդել նախաքննության ընթացքի վրա` ԶԼՄ-ների միջոցով սադրանքների ենթարկելով նախաքննական մարմնին եւ այլ պաշտոնյաների:

Լեռնապատի գյուղապետ` Վ.Եղիազարյան

Աղբյուրը` http://www.zhamanak.com/article/15887/