Միջազգային մարդասիրական իրավունքի ամառային դասընթաց

Հուլիսի 26-30-ը Երեւանում կազմակերպվեց հինգօրյա դասընթաց «Միջազգային մարդասիրական իրավունք» թեմայով:

Դասընթացին, որին մասնակցեցին նաեւ ՀՔԱ Վանաձորի գրասենյակի ներկայացուցիչները, մասնակցում էին տարբեր հասարակական կազմակերպությունների ներկայցուցիչներ եւ ուսանողներ::

Դասընթացին ներգրավված էին դասախոսներ  Երեւանի Պետական համալսարանից, Հայաստանում Ամերիկյան համալսարանից, Սահմանադրական դատարանի, Բելառուսիայի աշխատանքային եւ սոցիալական հարցերի ինստիտուտի, Հայաստանում Կարմիր Խաչի ընկերության եւ այլ կազմակերպությունների ներկայացուցիչներ:
  
Հինգօրյա դասընթացի ընթացքում մասնակիցները ծանոթացան միջազգային մարդասիրական իրավունքի պատմությանը, զարգացմանը, Ժնեւյան եւ Հաագային կոնվենցիաների դրույթներին, դրանց լրացուցիչ արձանագրություններին, ռազմական գործողություններ վարելու որոշ միջոցների արգելմանը եւ սահմանափակմանը, մշակութային արժեքների իրավական պաշտպանությանը զինված ընդհարումների ժամանակ:

Մասնակիցները ծանոթացան նաեւ Կարմիր խաչի եւ Կարմիր մահիկի միջազգային շարժմանը, նրա հիմնարար սկզբունքներին, Հայաստանում Կարմիր խաչի ընկերության գործունեությանը:

Յուրաքանչյուր դասախոսությունից հետո տեղի էր ունենում տվյալ ուսումնական իրավիճակի քննարկում, վերանայում եւ դերախաղ:

Դասընթացի վերջին օրը՝ հուլիսի 30-ին, տեղի ունեցավ «Միջազգային մարդասիրական իրավունք մարտահրավեր» մրցույթ, որը հնարավորություն տվեց  յուրաքանչյուր մասնակցին ստուգել  այդ հինգօրյա դասընթացի ընթացքում ստացած գիտելիքները:
  
Դասընթացը կազմակերպել էին Կարմիր Խաչի Միջազգային կոմիտեն եւ Հայաստանում Ամերիկյան համալսարանը: