Դանակը բաց պահարանում էր

Այսօր Հրազդանում շարունակվել է Վահան Խալաֆյանի մահվան գործով դատավարությունը: Դատարանն այսօր ավարտեց Չարենցավանի ոստիկանության պրոֆիլակտիկայի բաժնի պետ Կամո Միրումյանի հարցաքննությունը: Հիշեցնենք, որ հենց նրա աշխատասենյակում է տեղի ունեցել Վահան Խալաֆյանի հարցաքննությունը, որից հետո նա մահացել էր դանակի հարվածներ ստանալով:
 
Միրումյանն ասել է, թե իր սենյակում պահարանը բաց էր, որի մեջ դանակ կար: Նա ասել է, թե Չարենցավանի ոստիկանությունում ծառայողական հետաքննություն է անցկացվել, եւ ինքը դրա համար որեւէ տույժի չի ենթարկվել:
 
Միրումյանը հարցերին պատասխանում էր շփոթված, երբեմն չէր հասկանում հարցերը, անգամ` իրավական բնույթի: Երբ նրան հարցրին, թե ովքեր են իր սենյակում հարցաքննել Վահան Խալաֆյանին, նա պատասխանեց, թե անունները չի հիշում:
 
Միրումյանը նշեց նաեւ, թե ոստիկանության Չարենցավանի բաժնում վերջին մեկ տարում ինքնավնասման դեպք էլի է եղել:
 
Հիշեցնենք, որ ըստ պաշտոնական վարկածի` Վահան Խալաֆյանն ինքն է դանակով իրեն հարվածներ հասցրել ու մահացել: Վահանի հարազատները պնդում են, թե նրան սպանել են ոստիկանները:

ԱՂԲՅՈՒՐԸ` http://www.lragir.am/armsrc/country37061.html