Գործը կրկին ուղարկվեց նոր քննության

2010 թ. հունիսի 10-ին ՀՀ վերաքննիչ քրեական դատարանը բավարարեց Լոռու մարզի դատախազության վերաքննիչ բողոքը:

Դատարանի որոշմամբ Լոռու մարզի ընդհանուր իրավասության դատարանը պետք է վերաքննի քրեական գործ հարուցելու կամ քրեական գործի հարուցումը մերժելու մասին որոշում կայացնելու պարտավորեցնելու մասին ՀՔԱ Վանաձորի գրասենյակի դիմումը:

Նույն գործով ՀՀ վերաքննիչ դատարանը երկրորդ անգամ է որոշում կայացնում, որոնք իրարամերժ են: Առաջին անգամ ՀՀ վերաքննիչ քրեական դատարանը բավարարել է ՀՔԱ Վանաձորի  գրասենյակի բողոքը՝ այն ուղարկելով Լոռու մարզի ընդհանուր իրավասության դատարան` վերաքննության:

Այս անգամ էլ ՀՀ վերաքննիչ դատարանի կողմից բավարվել է Լոռու մարզի դատախազության վերաքննիչ բողոքը եւ ուղարկվել Լոռու մարզի ընդհանուր իրավասության դատարան` վերաքննության:

Գործի էությունը կայանում է նրանում, որ կազմակերպությունը դիմել էր դատարան դատախազության անգործությունը դատական կարգով վերացնելու համար: Դատարանի որոշմամբ դատախազությունը պետք է կայացներ քրեական գործ հարուցելու կամ քրեական գործի հարուցումը մերժելու մասին որոշում: 

Քննիչի կողմից առանց դատարանի որոշման կատարվել է բնակարանի անօրինական խուզարկություն: Դատախազությունը, որը անմիջական վերահսկողություն է իրականացնում քննիչի գործողությունների նկատմամբ, դրանք համարել է օրինական: Ավելին, դատախազությունն ինքն էլ օրենքի խախտումներ է թույլ տվել՝ հանցագործության փաստի կապակցությամբ ներկայացված հաղորդմանը ՀՀ քրեական դատավարության օրենսգրքով սահմանված կարգով չարձագանքելով:

ՀՀ քրեական դատավարության օրենսգրքով ներկայացված հաղորդման կապակցությամբ պետք է կայացվեր քրեական գործ հարուցելու կամ քրեական գործի հարուցումը մերժելու մասին որոշում եւ այդ որոշումը տրամադրվեր հաղորդումը ներկայացրած ֆիզիկական կամ իրավաբանական անձին, տվյալ դեպքում ՀՔԱ Վանաձորի գրասենյակին:

ՀՀ վճռաբեկ դատարանը դեռեւս 2009 թ. ՀՀ քրեական օրենսգրքի այս դրույթների պահանջը չկատարելը համարել է խախտում եւ որակել որպես անգործություն:

Օրենքի  պահանջների չկատարումը տվյալ դեպքում անհնարին է դարձնում քննիչի անօրինական գործողությունների դեմ պայքարը, դրանց վերացումը կամ  կանխարգելումը: Մինչդեռ դատախազությունն ինքն է օժտված հանցագործությունների դեմ պայքարելու լիազորությամբ:

Հոդվածին կցագրված ֆայլեր

Քրեական գործի հարուցումը մերժելու մասին որոշում կայացնելու պարտավորեցնելու մասին (298 KB)
Լոռու մարզի դատախազության վերաքննիչ բողոքը (343 KB)