Դանակով հարվածել է հացադուլավոր դատապարտյալի գլխին

Մայիսի 24-ից հացադուլ հայտարարած ցմահ դատապարտյալ Սողոմոն Քոչարյանն իր և նախկին խցակից ընկերոջ` Մհեր Ենոքյանի փախուստի գործով վճիռը հրապարակելուց առաջ այսօր հանդես եկավ հայտարարությամբ. "Իմ նկատմամբ բռնություն է կիրառվել խցակցիս կողմից, նա դանակով հարվածել է գլխիս", ասաց Սողոմոնը` ձեռքով ցույց տալով գլխի վիրավոր հատվածը:

Ի դեպ, Սողոմոնը մեղադրեց մեղադրողին` ասելով, որ տեղի ունեցածի մեջ նրա մատն է խառը:

Դատավոր Արթուր Օհանյանը նշեց, որ հայտարարությունը հաշվի կառնվի:

 
Սողոմոն Քոչարյանի մայրը` տիկին Զինան, պատմեց, որ օրեր առաջ, երբ հանքային ջուր ու ծխախոտ էր բերել որդուն, իրեն էին փոխանցել Սողոմոնի սպիտակեղենը, որի վրա տեղ-տեղ արյան հետքեր էին եղել. "Շատ վախեցա, որովհետև 15 տարի է իմ տղան անազատության մեջ է, ես նման բան չէի տեսել: Հետո զանգեց Սողոմոնն ու պատմեց, որ նոր խցակից են բերել ու հենց նա է խփել իրեն, երբ տղաս կեսգիշերին մոտ պառկել է քնելու: Աչքը կպնելու վրա սա խփել է, երրորդ տղան է գոռացել, թե Սողոմոն վեր կաց":

"Որտեղի՞ց այդ դանակը խցում, չէ՞ որ անձնական իրերի զննություն է իրականացվում, ինչո՞ւ այն չի առգրավվել: Նոր Գուրգեն Մարգարյան են ուզո՞ւմ", վրդովված ասում էին Սողոմոն Քոչարյանի հարազատները:

Թե Սողոմոնի, թե Մհերի հարազատները համոզմունք էին հայտնում, որ նրանց կյանքը վտանգված է Նուբարաշեն ՔԿՀ-ում:

"Չհամբերեցին անգամ դատավճռից հետո բանեցնեին մարդկանց լռեցնելու իրենց հնարքները: Եվ սա առաջին փորձն է, բացառված չէ, որ մի օր էլ Մհերի նկատմամբ կիրառեն այն", ասաց Մհեր Ենոքյանի եղբայրը:

ԱՆ Քրեակատարողական վարչության մամուլի քարտուղարի փոխանցմամբ, այս դեպքի առթիվ քրեական գործ հարուցված չէ. "Նյութեր են նախապատրաստվում", ասաց Արսեն Բաբայանը:

"Այն, որ հացադուլավոր դատապարտյալի խուցը չի առանձնացվել, արդեն իսկ ռեժիմի խախտում է: Ի՞նչ գործ ունի հացադուլ հայտարարած դատապարտյալի խցում մեկ այլ ազատազրկված: Սա անթույլատրելի է: Իսկ կատարվածը միանշանակ ճնշում է Սողոմոն Քոչարյանի նկատմամբ", ընդգծեց Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը:

ԱՂԲՅՈՒՐԸ` http://www.lragir.am/armsrc/country35629.html
 
Զարուհի Մեջլումյան