Ավարտվեց "Դրամաշնորհային ծրագրերի մշակում և իրականացում" երկամսյա դասընթացը

2010 թ. մարտի 19-ից մինչև մայիսի 2-ը Հելսինկյան Քաղաքացիական Ասամբլեայի Վանաձորի գրասենյակի կողմից իրականացվեց "Դրամաշնորհային ծրագրերի մշակում և իրականացում" երկամսյա դասընթացը:

Դասընթացին մասնակցեցին ՀՔԱ Վանաձորի գրասենյակի ներկայացուցիչները Սպիտակ, Ալավերդի, Ստեփանավան, Վանաձոր քաղաքներից /թվով 15 մասնակիցներ/: 

Դասընթացը վարեց վերահսկման և գնահատման մասնագետ, սոցիոլոգ Դիանա Տեր-Ստեփանյանը:

Դասընթացի նպատակն էր ՀՔԱ Վանաձորի գրասենյակի համապատասխան ներկայացուցիչներին սովորեցնել դրամաշնորհային ծրագրեր գրելու, դրանք դրամաշնորհ կազմակերպություններին ներկայացնելու և իրականացնելու կարողությանը:

Դասընթացի 12 պարապմունքների ընթացքում դասընթացավարի կողմից մասնակիցներին ներկայացվեց` ինչ է ծրագիրը, ծրագրի իրականացման չորս փուլերը` ծրագրի նախաձեռնում, մշակում, իրականացում և գնահատում, ավարտ, ներկայացվեց նաև` ինչպես իրականացնել ֆոնդահայթայթում:

Ներկայացված տեսական գիտելիքները դասընթացի մասնակիցները զուգահեռաբար կիրառում էին գործնականում, մասնավորապես` նրանք նախնական փուլում համապատասխան քաղաքներում իրականացրեցին կարիքի գնահատում` վեր հանելով համայնքին բնորոշ խնդիրները: Համատեղ քննարկման արդյունքում վերհանված խնդիրներից ընտրվեցին երկուսը: Եվ դասընթացի մասնակիցները սկսեցին համապատասխան աշխատանքներ իրականացնել այդ խնդիրների լուծման կապակցությամբ, մասնավորապես` սկսեցին աշխատել ծրագրերի պլանավորման և կազմման վրա:

Դասընթացի արդյունքում ՀՔԱ Վանաձորի գրասենյակի Սպիտակի, Ստեփանավանի, Ալավերդու ներկայացուցիչները ձեռք բերեցին ծրագրի կազմման և իրականացման գիտելիքներ, համատեղ կազմեցին դրամաշնորհային 2 ծրագրերի նախնական հայտ-առաջարկներ:

Նշենք, որ ծրագրերի նախնական հայտ-առաջարկները ներկայացվեցին Բաց հասարակության ինստիտուտի աջակցության հիմնադրամի հայաստանյան մասնաճյուղին. հիմնադրամը հայտարարել էր մրցույթ Հայաստանում մարդու իրավունքների բնագավառում գործունեություն իրականացնող ՀԿ-ների համար: Մրցույթը երկու փուլով է և առաջին փուլի հաղթահարման դեպքում հիմնադրամին կներկայացվեն ծրագրի առաջարկները:

Ներկայումս դասընթացի մասնակիցները աշխատում են ծրագրերի կազմման վրա: Ծրագրերից առաջինը` "Բարձր իրավագիտակցությամբ զինվոր` հզոր բանակ",  նպատակ ունի բարձրացնել Լոռու մարզի զորակոչիկների և զինծառայողների իրազեկման մակարդակը` իրազեկման կայուն մեխանիզմների ստեղծման միջոցով, երկրորդը` "Պալիատիվ օգնության հասանելիությունը մարդու իրավունքների շարքում", նպատակ ունի բացահայտել պալիատիվ բուժօգնության վիճակը Հայաստանի Հանրապետությունում:

Հիշեցնենք, որ դասընթացը իրականացվել է "ՀՔԱ Վանաձորի գրասենյակի իրավապաշտպանական կարողությունների և գործունեության արդյունավետության բարձրացումը" ծրագրի շրջանակներում, Բաց հասարակության ինստիտուտի աջակցության հիմնադրամի հայաստանյան մասնաճյուղի և Նիդերլանդների կառավարության համատեղ ֆինանսավորմամբ: