Աշխատանքային քննարկում

Ապրիլի 22-ին ՀՀ ԱԺ պաշտպանության, ազգային անվտանգության եւ ներքին գործերի մշտական հանձնաժողովը "Հասարակական վերահսկողությունը զինված ուժերի համալրման նկատմամբ" թեմայով կազմակերպել էր ընդլայնված աշխատանքային քննարկում:

Քննարկմանը մասնակցում էին ԱԺ պատգամավորներ, ՀՀ պաշտպանության նախարարության, ՀՀ հանրապետական զինկոմիսարիատի, ՀՀ զինդատախազության, միջազգային կազմակերպությունների եւ տեղական հասարակական կազմակերպությունների ներկայացուցիչներ, լրագրողներ:

Աշխատանքային հանդիպման նպատակն էր՝ մասնակիցներին ներակայացնել "Հելսինկյան Քաղաքացիական Ասամբլեայի Վանաձորի գրասենյակ", "Զինվորի մայր" եւ "Պրոակտիվ հասարակություն" հասարակական կազմակերպությունների կողմից ԵԱՀԿ Երեւանի գրասենյակի ֆինանսական աջակցությամբ 2009 թ-ին Հայաստանում իրականացված զորակոչի մոնիթորինգի արդյունքները:

Հանդիպման ընթացքում հասարակական կազմակերպություններից յուրաքանչյուրը ներկայացրեց իրենց բացահայտումների, զորակոչի գործընթացի թերությունները, ինչպես նաեւ ներկայացրեցին առաջարկություններ՝ ուղղված թերությունների վերացմանը:

Մոնիթորինգի ընթացքում հիմնական խնդիրները  վերաբերվում են դատական պաշտպանություն ստանալու, առողջության պաշտպանության եւ կրթության իրավունքին, բժշկական հետազոտության ընթացքում քաղաքացիների իրավունքների խախտմանը,  զորակոչիկների՝ իրենց իրավունքների եւ ընթացակարգի մասին ոչ բավարար իրազեկման մակարդակին եւ այլն:

Հասարակական կազմակերպությունների ղեկավարները ներկայացրերցին իրենց առաջարկությունները, մասնավորապես  Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը առաջարկեց դպրոցներում առանձնահատուկ ուշադրություն դարձնել զորակոչիկների իրավունքների եւ պարտականությունների ուսուցմանը, իրականացնել առողջական վիճակի բոլոր համալիր հետազոտությունները՝ անկախ զորակոչիկի գանգատներից, բարձրացնել քաղաքացիական բժիշկների դերը զինվորական բժշկական հանձնաժողովներում, մեծացնել զորակոչի թափանցիկությունը, որպես պարտադիր կանոն, զորակոչիկներին տրամադրել առողջական վիճակի զննության վերաբերյալ բժշկական հանձնաժողովների եզրակացությունը՝ դրանով հնարավորություն տալով զորակոչիկին անհամաձայնության դեպքում բողոքարկել եզրակացությունը, մեծացնել հեռավոր բնակավայրերից զինկոմիսարիատներ ներկայանալու, բուժզննություն անցնելու համար տրանսպորտային վճարների փոխհատուցումը, ապահովել սննդի եւ գիշերելու համար անհրաժեշտ ֆինանսական հատկացումները, ձեւավորել զորակոչի գործընթացի նկատմամբ քաղաքացիական վերահսկողության ինստիտուտ եւ բարձրացնել մինչեւ 16 տարեկան երիտասարդների առողջական վիճակի նկատմամբ վերահսկողությունը:

"Զինվորի մայր" ՀԿ-ի ղեկավար Գրետա Միրզոյանի և կազմակերպության ներկայացուցիչ Անահիտ Հովնանյանի կողմից առաջարկվեց կատարել համապատասխան կանոնակարգային փոփոխություններ եւ ռազմաբժշկական հանձնաժողովների համար սահմանել օրինական հիմքեր` զորակոչիկի հիվանդության վերաբերյալ այլընտրանքային հիմնավորված բժշկական եզրակացությունը քննելու համար, մշակել հստակ համակարգ` թերացած բժիշկներին վարչական եւ նյութական պատասխանատվության ենթարկելու համար, կազմակերպել զորակոչիկների եւ նրանց ընտանիքների իրազեկմանը նպաստող միջոցառումներ:

"Պրոակտիվ հասարակություն" ՀԿ-ի ղեկավար Աննա Մարգարյանը առաջարկեց զորակոչիկին ծանուցագրի հետ հանձնել նաեւ զորակոչից տարկետման, զինծառայությունից ազատման, բնակավայրին մոտ ծառայելու հիմքերը պարզաբանող հուշաթերթ, բժշկական խմբի վերջնական եզրակացություն սահմանել, մշակել տեղեկատվության փոխանցման պրոակտիվ մեխանիզմներ, կազմակերպել իրազեկմանն ուղղված միջոցառումներ: Կազմակերպությունը ներկայացրեց նաեւ պայմանագրային զինվորական ծառայության վերաբերյալ հետազոտության արդյունքները

Հանդիպմանը ներկա գտնվող ՀՀ զինվորական կոմիսարի տեղակալ Գագիկ Հարությունյանը նշեց, որ այսուհետ  այդ խնդիրները իրենց ուշադրության կենտրոնում կլինեն: Նա հավաստիացրեց, որ համապատասխան օրենսդրական փոփոխություններով, գործառույթների հստակեցմամբ ու վերահսկողական անհրաժեշտ աշխատանքներով կշտկվեն բացթողումները` հավելելով, որ "Զինապարտության մասին" եւ "Տեղական ինքնակառավարման մարմինների մասին" օրենքներում հնչած առաջարկների մի մասն արդեն կանոնակարգված է: Նրա համոզմամբ` զորակոչին ու զորակոչիկներին վերաբերող իրազեկման մակարդակը բարձրացնելու համար անհրաժեշտ է օրենքի պահանջները ներառել դպրոցական ծրագրերում: Գագիկ Հարությունյանը տեղեկացրեց, որ արդեն հաստատված է պաշտպանության նախարարության բարեփոխումների պլանը, հստակեցված են զորակոչին վերաբերող  գործառույթները, հաշվառման եւ բուժզննության կարգն ու մեխանիզմները: