Ովքե՞ր են սեփականաշնորհում մարդու խիղճը

ՀՀ Սահմանադրության 26-րդ հոդվածում թեև ամրագրված է, որ յուրաքանչյուր ոք ունի մտքի, խղճի եւ կրոնի ազատության իրավունք, սակայն այդ դրույթը ժամանակ առ ժամանակ ոտնահարվում է:

ԵԱՀԿ երեւանյան գրասենյակի եւ «Համագործակցություն հանուն ժողովրդավարության» կենտրոնի հետազոտությունները ցույց են տվել, որ ՀՀ-ում կրոնի եւ խղճի ազատությունը ոտնահարվում է հատկապես մարզերում:

«Կրոնական հանդուրժողականությունը Հայաստանում» թեմայի շրջանակներում այսօր  Հելսինկյան Քաղաքացիական Ասամբլեայի Վանաձորի գրասենյակի նախագահ, իրավապաշտպան Արթուր Սաքունցն ներկայացրեց Լոռու մարզում իր արձանագրած բազմաթիվ կրոնական անհանդուրժողականության դեպքերը:

Վանաձորի դպրոցներից մեկում, ուսուցիչներից մեկն իրեն իրավունքն է վերապահում բոլոր երեխաններին «զննել» կրոնական տեսանկյունից: Ոչ առաքելական եկեղեցի այցելող երեխանները արժանանում են ուսուցչի բացասական վերաբերմունքին: Ըստ Արթուր Սաքունցի` նույն ուսուցչուհին ակտիվ մասնակցություն է ունենում նաեւ ընտրական գործընթացների կեղծիքներին:

«Որեւէ մեկը, կամ որեւէ եկեղեցի չի կարող սեփականաշնորհել իմ խիղճն ու ազատությունը, թե ես ում դավանեմ, ինչին դավանեմ»,- ասաց Արթուր Սաքունցը: Նրա կարծիքով այսօր եկեղեցին, կրոնական կազմակերպություններն ու հասարակությունը միմյանցից մեկուսացված են:

Ազգագրագետ Հրանուշ Խառատյանը, որ կառավարությունում զբաղվում էր հենց կրոնի եւ ազգային փոքրամասնությունների խնդիրներով վստահեցրեց, որ ՀՀ-ում շատ հանդուրժող են էթնիկ փոքրամասնությունների, նրանց կրոնի եւ ավանդույթների նկատմամբ:

Տիկին Խառատյանը ողջունում է այն երևույթը, որ մամուլը սկսել է ավելի հաճախ եւ հավասարակշիռ անդրադառնալ կրոնական խնդիրներին:

Ազգագրագետը դրական է գնահատում նաեւ «Մոսկվա» կինոթատրոնի ամառային դահլիճը քանդելու եւ այդ վայրում եկեղեցի կառուցելու որոշման վերաբերյալ հասարակության արձագանքներին:

«Իրադարձությունները ցույց են տալիս, որ մեր հասարակությունը զգայուն է դարձել կրոնական հարցերի նկատմամբ: Ես ուրախ եմ, որ մեր հասարակությունը հարց է բարձրացնում, թե դատարկ եկեղեցիների առկայության դեպքում, ինչ կարիք կա նոր եկեղեցի կառուցել»: Տիկին խառատյանի կարծիքով, ՀՀ-ում մարդու իրավունքների ոտնահարման բոլոր երեւույթները կան նաեւ էթնիկ փոքրամասնությունների, եւ նրանց կրոնական հարաբերություններում:

Ավետարանչական եկեղեցու առաջնորդ Ռենե Լեւոնյանը հույս հայտնեց, որ պետությունը կքննարկի ՀՀ օրենսդրությամբ ամրագրված կրոնական կազմակերպությունների գործունեությունը. «Մենք հակադրություն ենք տեսնում Սահմանադրության եւ մյուս օրենքների միջեւ:

Սահմանադրությունն ասում է, որ ՀՀ քաղաքացին ազատ է կրելու իր կրոնը, իսկ «Կրոնի ազատության մասին» օրենքը սահամանափակումներ է դնում: Մեզ համար հայ առաքելական եկեղեցին մեծ նշանակություն ունի, բայց մյուս կրոնական կազմակերպություններն էլ իրավունք ունեն ազատ դավանելու իրենց կրոնը»:

ԱՂԲՅՈՒՐԸ`

http://www.a1plus.am/am/politics/2010/04/14/religious-tolerance