Ռազմական բյուջեի մոնիթորինգ

2010 թ. մարտի 22-26-ը ՀՔԱ Վանաձորի գրասենյակը «Քաղաքացիական վերահսկողության ձեւավորումը զինված ուժերի նկատմամբ» ծրագրի շրջանակներում կազմակերպել էր «Ռազմական բյուջեի մոնիթորինգ» թեմայով հինգօրյա դասընթաց:

Դասընթացի նպատակն էր ուսուցանել ռազմական բյուջեի մոնիթորինգի սկզբունքները եւ իրականացման գործիքները:

Դասընթացին մասնակցում էին «Թրանսփարենսի ինթերնեշնլ հակակոռուպցիոն կենտրոն», «Համայնքների ֆինանսիստների միություն», «Համագործակցություն հանուն ժողովրդավարության», «Հելսինկյան ասոցիացիա», «Քաղաքացիական հասարակության ինստիտուտ», «ՀՔԱ Վանաձորի գրասենյակ» հասարակական կազմակերպությունների ներկայացուցիչները:

Դասընթացի սկզբում ՀՔԱ Վանաձորի գրասենյակի նախագահ Արթուր Սաքունցը մասնակիցներին ներկայացրեց ծրագրի գաղափարը եւ դասընթացի նպատակը, զինված ուժերի նկատմամբ քաղաքացիական վերահսկողության  իրականացման անհրաժեշտությունը որպես սահմանադրական իրավունք եւ որպես միջոց՝ նվազեցնելու զինված ուժերի անվերահսկելիությունը, կանխարգելելու միլիտարիզացիան: 

Դասընթացը վարում էր Բուլղարիայի գիտությունների ակադեմիայի անվտանգության եւ պաշտպանության կառավարման կենտրոնի ներկայացուցիչ  դոկտոր Վենելին Գեորգիևը:

Հինգօրյա դասընթացի ընթացքում մասնակիցներին ներկայացվեց զինված ուժերի նկատմամբ քաղաքացիական եւ ժողովրդավարական վերահսկողության կոնցեպցիան, դրա առարկան, նպատակը եւ խնդիրները, վերահսկողության բնագավառում կիրառվող մեթոդներն ու գործիքները: Կարևորվեց պաշտպանության ռեսուրսների ծրագրային կառավարումը եւ սահմանվեցին պաշտպանության բնագավառի առաքելությունները:

Ներկայացնելով Բուլղարիայի եւ այլ երկրների փորձը առկա խնդիրների լուծման բնագավառում՝ կապված պաշտպանական բյուջեի իրականացման գործընթացի հետ, պարոն Գիորգիեւվը ընդգծեց պաշտպանության գործողությունների վերաբերյալ հանրային իրազեկման, թափանցիկության եւ հաշվետվողականության անհրաժեշտությունը: 

Դասընթացի բոլոր թեմաները ներկայացվեցին տեսության եւ գործնական աշխատանքների միջոցով:
Մասնակիցները ուսումնասիրեցին ազգային օրենսդրությունը եւ պաշտպանական ծախսերը ներկայացնող փաստաթղթերը՝ ՀՀ Սահմանադրությունը, ՀՀ Ազգային անվտանգության ռազմավարությունը, ՀՀ Ռազմական դոկտրինան, ՀՀ ՊՆ հանրային իրազեկման հայեցակարգը՝ փորձելով սահմանել դրանց իրավական կարգավորումները:

Դասընթացի մասնակիցները առաջիկա ամիսների ընթացքում կիրականացնեն ՀՀ պաշտպանության նախարարության բյուջեի ուսումնասիրություն, որի արդյունքները կտպագրվեն եւ կներկայացվեն պետական եւ հասարակական կառույցներին:

«Քաղաքացիական վերահսկողություն զինված ուժերի նկատմամբ» ծրագիրն իրականացվում է նիդերլանդական ICCO (Համագործակցության զարգացման միջեկեղեցական կազմակերպություն) կազմակերպության ֆինանսական աջակցությամբ: