"Հանրային պաշտպանների կարողությունների զարգացում` թմրամիջոց գործածող անձանց իրավունքների պաշտպանության բնագավառում"

2010 թ-ի մարտի 6-7-ը ՀՔԱ Վանաձորի գրասենյակի կողմից Լոռու, Շիրակի, Տավուշի մարզերի և Երևանի  հանրային պաշտպանների համար Վանաձորում կազմակերպվել էր երկօրյա դասընթաց: 

Դասընթացի  նպատակն էր զարգացնել նշված մարզերի հանրային պաշտպանների կարողությունները` թմրամիջոցների ապօրինի շրջանառության հետ կապված հանցանքների կատարման մեջ մեղադրվող անձանց իրավունքների պաշտպանության բնագավառում:

Դասընթացին մասնակցում էին  Երևանից 5, Լոռու մարզից 3, Շիրակի մարզից 2, Տավուշի մարզից 1 հանրային պաշտպաններ:
Դասընթացը վարում էր Երևանի պետական համալսարանի դասախոս, իրավաբանական գիտությունների թեկնածու Արման Թաթոյանը:

Դասընթացի ընթացքում մասնակիցներին ներկայացվեցին արդար դատաքննության իրավունքի էությունն ու բաղադրատարրերը` ըստ եվրոպական չափանիշների, անձի կալանավորման հիմքերը, ողջամիտ ժամկետի որոշման հարցում Եվրոպական դատարանի 4 հիմնական չափանիշները, ինչպես նաև "անկախ, անկողմնակալ դատարան" հասկացությունը:
Ներկայացվեցին նաև կողմերի հավասարության և մրցակցության, ապացույցների թույլատրելիության հարցերը` որպես արդար դատաքննության իրավունքի բաղադրատարրեր, ինչպես նաև պաշտպանության իրավունքի ապահովման երաշխիքները ՀՀ քրեական դատավարությունում:

Քննարկվեցին թմրամիջոցների ապօրինի շրջանառության հետ կապված հանցանքների կատարման մեջ մեղադրվող անձանց նկատմամբ իրավապահ մարմինների կողմից թույլ տրվող խախտումները, ինչպիսիք են արարքը ոչ ճիշտ որակելը, թմրասովի մեջ գտնվող անձին կեղծ ցուցմունք տալուն հարկադրելը, ընդամենը մեկ վկայի ցուցմունքով անձին դատապարտելը, անձին հարկադիր բուժման ուղարկելու հետ կապված խնդիրները և այլն:

Մասնակիցները հնարավորություն ունեցան ներկայացնել իրենց վարույթում առկա գործերին առնչվող  անհասկանալի հարցերը, որոնք քննարկվեցին և ստացան սպառիչ պատասխաններ:

Դասընթացի ավարտին հանրային պաշտպանների հետ ձեռքբերվեց պայմանավորվածություն` թմրամիջոցների ապօրինի շրջանառության մեջ մեղադրվող անձանց քրեական գործերի մինչդատական փուլերի մոնիթորինգ իրականացնելու հարցում:

Մոնիթորինգն իրականացվելու է Լոռու, Շիրակի, Տավուշի մարզերում և Երևանում` առաջիկա վեց ամիսների ընթացքում`  ըստ ՀՔԱ Վանաձորի գրասենյակի կողմից մշակված գործիքի:

Դասընթացը կազմակերպվել էր Բաց Հասարակության ինստիտուտի Օժանդակության հիմնադրամի Հայաստանի մասնաճյուղի ֆինանսավորմամբ իրականացվող "Իրավական աջակցություն Լոռու, Շիրակի, Տավուշի մարզերի եւ Երևանի թմրամիջոց գործածողներին" ծրագրի շրջանակներում: