Երիտասարդներին մտահոգող խնդիրները

2010 թվականի փետրվարի 4-ին Հելսինկյան Քաղաքացիական Ասամբլեայի  Վանաձորի գրասենյակի Սպիտակի ներկայացուցչությունում տեղի ունեցավ երիտասարդական քննարկում:

Քննարկումը կազմակերպվել էր ՀՔԱ  Վանաձորի գրասենյակի Սպիտակի ներկայացուցչության աշխատակիցների կողմից:

Քննարկման նպատակն էր` պարզել Սպիտակ քաղաքի երիտասարդների դերը հասարակական կյանքում, վերհանել խնդիրները, որոնք առնչվում են նրանց և պարզել, թե ինչպես կարելի Է գտնել դրանց լուծումները:

Քննարկմանը մասնակցում էին ՀՔԱ Վանաձորի գրասենյակի նախագահ Ա. Սաքունցը, ՀՔԱ Վանաձորի գրասենյակի և Սպիտակի ներկայացուցչության աշխատակիցները և Սպիտակ քաղաքի երիտասարդներ:

Քննարկման ընթացքում մասնակիցները նշեցին իրենց մտահոգող խնդիրները: Նրանք առաջնային են համարում Սպիտակ քաղաքի մշակութային, սոցիալական և  տնտեսական խնդիրները:

Մշակութային ոլորտում երիտասարդներին մտահոգում էր ազատ ժամանց անցկացնելու մշակույթի բացակայությունը: Սպիտակ քաղաքում շատ քիչ են ժամանցի վայրերը և հազվադեպ են կազմակերպվում ժամանցային միջոցառումներ:

Քննարկման մասնակիցների թվում կային նաև ուսանողներ, որոնք իրենց դժգոհությունն էին արտահայտում այն հարցի շուրջ, որ Սպիտակ քաղաքում չկան  բարձրագույն ուսումնական հաստատություններ, արհեստների ուսուցման համար նախատեսված ուսումնարաններ և իրենք ստիպված են լինում դպրոցից հետո ուսումը շարունակել Հայաստանի Հանրապետության այլ քաղաքներում: Մասնակիցները դժգոհ էին նաև դպրոցներում դասավանդման ոչ լիարժեք որակից, գրադարաններում գրքերի բազմազանության պակասից և աշխատակիցների ոչ հարգալից վերաբերմունքից:

Սպիտակ քաղաքի բնակիչների համար որպես առաջնահերթ խնդիր նշվում էր հատկապես քաղաքացիներին բնակարաններով  և աշխատատեղերով ապահովելու խնդիրը:

Քաղաքացիներն ունեն նաև տեղեկատվության միջոցների պակաս: Մասնավորապես` հեռարձակվում է առավելագույնը 4 հեռուստաալիք, ընդ որում այդ հեռուստաալիքներից մեկը` Սպիտակի տեղական հեռուստաալիքը, ըստ երիտասարդների պասիվ գործունեություն է իրականացնում: Գործում է նաև մեկ տեղական ռադիոալիք, որը ևս պասիվ գործունեություն է իրականացնում:

Քննարկման ընթացքում նշվեցին  նաև քաղաքի աղտոտվածության, լուսավորության, ներքաղաքային տրանսպորտի բացակայության, լուսացույցների պակասի, ճանապարհների անմխիթար վիճակի, երեխաների համար  խաղահրապարակների բացակայության խնդիրները:

Այս խնդիրներին որոշակի չափով լուծում տալու համար քննարկման մասնակիցներն որոշեցին ակտիվորեն համագործակցել ՀՔԱ Վանաձորի գրասենյակի և  Սպիտակի ներկայացուցչության հետ, կազմակերպել քննարկումներ, միջոցառումներ, իրազեկման արշավներ, ներգրավվել այլ քաղաքացիների: