Դասընթաց՝«Պացիենտների իրավունքների միջազգային ստանդարտները» թեմայով

2010 թվականի հունվարի 23-ին Գյումրիի «Փյունիկ» հաշմանդամների միություն ՀԿ-ում ՀՔԱ Վանաձորի գրասենյակի կողմից կազմակերպվել էր «Պացիենտների իրավունքների միջազգային ստանդարտները» թեմայով դասընթաց:

Դասընթացի նպատակն էր բարձրացնել հանրության իրազեկվածությունը պացիենտների իրավունքների և դրանց վերականգնման հնարավոր մեխանիզմների մասին:

Դասընթացին մասնակցում էին Շիրակի մարզպետարանի Առողջապահության վարչության բաժնի պետը, Տեղեկատվության եվ հասարակայնության հետ կապերի բաժնի պետը, Գյումրու թվով 4 պոլիկլինիկաների, շտապ բուժօգնության կայանի, ինչպես նաեւ ընտանեկան բժշկության կենտրոնի բուժաշխատողներ, թվով 6 հասարակական կազմակերպությունների ներկայացուցիչներ:

Դասընթացը վարում էր Հելսինկյան Քաղաքացիական Ասամբլեայի Վանաձորի գրասենյակի նախագահ Արթուր Սաքունցը: Վերջինս ներկայացրեց «Մարդու իրավունքներ» եւ «Առողջության իրավունք» հասկացությունները, «Պացիենտների իրավունքների Եվրոպական խարտիան», ինչպես նաեւ այլ միջազգային ու տարածաշրջանային փաստաթղթեր, որոնցում արտացոլված են պացիենտների իրավունքները:  Տեղեկատվություն հաղորդվեց նաեւ պալիատիվ օգնության վերաբերյալ՝ որպես հիվանդի ցավերի մեղմման եւ կյանքի որակի բարելավմանն ուղղված մոտեցում: Ներկայացվեց պալիատիվ օգնության կապը մարդու իրավունքների հետ եւ նրա շրջանակներում պացիենտին ու նրա ընտանիքին մատուցվող ծառայությունները:

Գործնական աշխատանքների միջոցով դասընթացի մասնակիցների կողմից վեր հանվեցին առողջապահության ոլորտում առկա մի շարք խնդիրներ, որոնք դասակարգվեցին ըստ «Պացիենտների իրավունքների Եվրոպական խարտիայում» ամրագրված իրավունքների:

Մասնավորապես ձեւակերպվեցին Գյումրու պոլիկլինիկաներում առկա այնպիսի հիմնախնդիրներ, ինչպիսիք են անհրաժեշտ եւ որակյալ դեղորայքի, բուժսարքավորումների պակաս, ոչ բավարար ֆինանսավորում, մասնագետների  /մանկական նեւրոպաթոլոգ, էնդոկրինոլոգ, ուռոլոգ, հոգեբան/ պակաս, մանկական սննդի պակաս, ոչ բարյացակամ վերաբերմունք պացիենտի նկատմամբ, ավելորդ թղթաբանություն, որի պատճառով հիվանդին հատկացվում է չափազանց կարճ ժամանակահատված եւ այլն:

Ծրագրի շրջանակներում նախատեսվում է Լոռու, Շիրակի և Տավուշի մարզերում ուսումնասիրել պացիենտների իրավունքների պահպանման վիճակը: Ուսումնասիրության արդյունքում բացահայտված խնդիրների կապակցությամբ հետագայում կմշակվեն առաջարկություններ, որոնք կներկայացվեն ՀՀ Առողջապահության նախարարություն: Ներկայումս ուսումնասիրությունն անց է կացվում Գյումրի քաղաքում:

Դասընթացը կազմակերպվել էր ՀՔԱ Վանաձորի գրասենյակի կողմից իրականացվող ''Իրավական աջակցություն Լոռու, Շիրակի, Տավուշի մարզերի և Երևանի թմրամիջոց գործածողներին'' ծրագրի շրջանակներում, որն իրականացվում է Բաց Հասարակության ինստիտուտի Օժանդակության հիմնադրամի Հայաստանի մասնաճյուղի ֆինանսական աջակցությամբ: