''Խոցելի խմբերի առողջության իրավունքը` մարդու իրավունքների համատեքստում''

2009 թ. նոյեմբերի 27-ին Իջևանում կազմակերպվել էր դասընթաց ''Խոցելի խմբերի առողջության իրավունքը` մարդու իրավունքների համատեքստում'' թեմայով:

Դասընթացին մասնակցում էին Իջևանի, Դիլիջանի, Նոյեբերյանի և Բերդի 8 հասարակական կազմակերպությունների ներկայացուցիչներ, Եվրոպական տարածաշրջանային ակադեմիայի Իջևանի մասնաճյուղի ուսանողներ, Իջևանի բժշկական կենտրոնի բժիշկ-հոգեբույժը:

Դասընթացի ընթացքում մասնակիցները ծանոթացան ''Մարդու իրավունքներ'' և ''Առողջության իրավունք'' հասկացություններին, պացիենտների իրավունքներն արտացոլող ազգային և միջազգային օրենսդրությանը, պացիենտների իրավունքների Եվրոպական խարտիայով սահմանված իրավունքներին:

Առանձին անդրադարձ կատարվեց թմրամիջոց գործածող անձանց և ՄԻԱՎ/ՁԻԱՀ-ով ապրող մարդկանց` որպես խոցելի խմբի մարդու իրավունքներին:

Մասնակիցները հնարավորություն ունեցան ստացած գիտելիքներն ամրապնդել գործնական վարժություններով: Մասնավորապես` սովորեցին կոնկրետ իրավիճակներում որոշել կա արդյոք պացիենտի իրավունքի խախտում և նշել խախտված իրավունքի տեսակը` ըստ պացիենտների իրավունքների Եվրոպական խարտիայի:

Որպես փորձագետ ներգրավված էին ''Հակաթմրամոլային քաղաքացիական դաշինք'' հ/կ-ի նախագահ, բժիշկ-փորձագետ Արթուր Պոտոսյանը և նույն կազմակերպության իրավաբան Վիոլետա Զոփունյանը:

Դասընթացը կազմակերպվել էր ՀՔԱ Վանաձորի գրասենյակի կողմից իրականացվող ''Իրավական աջակցություն Լոռու, Շիրակի, Տավուշի մարզերի և Երևանի թմրամիջոց գործածողներին'' ծրագրի շրջանակներում, որն իրականացվում է Բաց Հասարակության ինստիտուտի Օժանդակության հիմնադրամի Հայաստանի մասնաճյուղի ֆինանսական աջակցությամբ: