ՀՔԱ Վանաձորի գրասենյակը շարունակում է զորակոչի գործընթացի ուսումնասիրության իրականացումը

Սեպտեմբերի 30-ին ՀՔԱ Վանաձորի գրասենյակում ''Զորակոչի նկատմամբ մոնիթորինգի իրականացում'' ծրագրի շրջանակներում տեղի ունեցավ մոնիթորների դասընթաց:

Դասընթացը, որին  մասնակցում էին  Լոռու, Տավուշի և Շիրակի մարզերի մոնիթորները, ուղղված էր աշնանային զորակոչի մոնիթորինգի արդյունավետ իրականացման կազմակերպմանը:

Զորակոչի գործընթացի մոնիթորինգի իրականացումը ներառում է կցագրման, ծանուցման, բուժզննության ընթացքի, զորակոչիկների նկատմամբ զինկոմիսարիատների և բժշկական հանձնաժողովների վերաբերմունքի ուսումնասիրությունը:

Ամփոփելով գարնանային զորակոչի մոնիթորինգի արդյունքները` ՀՔԱ Վանաձորի գրասենյակի ղեկավար Ա. Սաքունցը նշեց, որ պետք է առավել ուշադիր լինել բժշկական հանձնաժողովների աշխատանքների նկատմամբ:

''Մշակված հարցաշարերը մեզ հնարավորություն են տալիս պատկերացում կազմել զորակոչի գործընթացի վերաբերյալ, մշակել առաջարկություններ այդ գործընթացը բարելավելու համար'',-  ավելացրեց Արթուր Սաքունցը:

Դասընթացի ժամանակ քննարկվեցին գարնանային զորակոչի մոնիթորինգի ընթացքում առաջացած դժվարությունները, արվեցին առաջարկություններ:

Ինչպես և գարնանային զորակոչի ժամանակ, աշնանային զորակոչի ընթացքում ևս նախատեսված են հարցազրույցներ անցկացնել զորակոչիկների և նրանց հարազատների, զորացրվածների, ինչպես նաև տեղական ինքնակառավարման մարմինների, դպրոցների, տեղական զինկոմիսարիատների և պոլիկլինիկաների աշխատկիցների շրջանում:

Հարցազրույցներն իրականացվելու են Շիրակի, Լոռու և Տավուշի մարզերում հոկտեմբերի 1-ից մինչև դեկտեմբերի 31-ը:

''Զորակոչի նկատմամբ մոնիթորինգի իրականացում'' ծրագիրը իրականացվում է ԵԱՀԿ երևանյան գրասենյակի աջակցությամբ: