Անվճար իրավախորհրդատվություն Ստեփանավան, Ալավերդի, Տաշիր և Սպիտակ քաղաքներում

2009 թ. հուլիս ամսին Հելսինկյան Քաղաքացիական Ասամբլեայի Վանաձորի գրասենյակի Ստեփանավանի, Ալավերդու, Տաշիրի և Սպիտակի կենտրոններ անվճար իրավախորհրդատվություն ստանալու համար դիմել են 5 քաղաքացիներ:

Այսպես, ՀՔԱ Վանաձորի գրասենյակի Լոռու մարզի Ստեփանավան, Ալավերդի, Տաշիր և Սպիտակ քաղաքների կենտրոններ քաղաքացիները դիմել են հետևյալ հարցերով.

Ալավերդի

1. Քաղաքացին պայմանագիր է կնքել փաստաբանի հետ՝ փաստաբանական ծառայություն ստանալու համար և վճարել է 50.000 դրամ, սակայն փաստաբանը չի մատուցել պայմանարով նախատեսված ծառայությունները:

Քաղաքացու համար կազմակերպության կողմից պատրաստվել է պաստաբանների պալատի նախագահին ուղղված դիմում, որի կապակցությամբ ձեռնարկված միջոցառումները դեռևս ընթացքի մեջ են:

2. 2009 թ. մայիսի 24-ին Սանահին կայարանի մոտ տաքսի ծառայության ավտոմեքենան ենթարկվել է ավտովթարի, և վարորդը ստացելէ ծանր մարմնական վնասվածքներ: Սակայն դեռևս որևէ միջոցառում չի իրականացվել:

Քաղաքացու անունից պատրաստվել է գրություն` քրեական գործ հարուցելու կամ քրեական գործի հարուցումը մերժելու մասին որոշում ստանալու և հետագա ընթացքը լուծելու համար:

3. Քաղաքացին ամուսնալուծության դեպքում կարող է համատեղ կյանքի ընթացքում իրենց տրամադրած բնակարանից պահանջել իր բաժինը:

Ամուսնության ընթացքում համատեղ ձեռք բերված գույքը հանդիսանում է ամուսինների համատեղ սեփականություն, և ամուսնալուծությունից հետո հավասարապես կարող է բաժանվել ամուսինների միջև:

Տաշիր

1. Քաղաքացուն պատճառել են ծանր մարմնական վնասվածքներ, որի հետևանքով նա կատարել է բազմաթիվ ծախսեր: Վնաս պատճառած անձը դատական կարգով ճանաչվել է մեղավոր, սակայն նրա կողմից առողջությանը պատճառված վնասի փոխհատուցում չի իրականացվել:

Վնասի փոխհատուցման պահանջով քաղաքացու համար կազմակերպության կողմից պատրաստվել է հայցադիմում:

Ստեփանավան

1. Քաղաքացին վարկային պայմանագիր է կնքել բանկի հետ` գրավ դնելով իր բնակարանը, սակայն նա ի վիճակի չէ կատարել իր ամսական վճարումները: Գրավ դրված տան արժեքը չի բավարարում վարկն ու կուտակված տոկոսները վճարելու համար և որպես հայցի ապահովման միջոց արգելանք է դրվել քաղաքացու մեկ այլ բնակարանի վրա: Քաղաքացին ի՞նչ կարող է անել 2-րդ բնակարանը չկորցնելու համար:

Քաղաքացուն բացատրվել է, որ իր 2-րդ բնակարանը հրապարակային սակարկությունների ճանապարհով վաճառելուց առաջ իրենց բնակարանի մյուս համասեփականատերերը հնարավորություն կունենան նախապատվության իրավունքով գնելու իր բաժնեմասը: